Amakuru ku Mirwano Yongeye Kubera mu Misozi ya Rurambo
MINEMBWE CAPITAL NEWS (MCN)
Amakuru Minembwe Capital News (MCN) imaze kwakira agaragaza ko kuri uyu wa Kane, tariki ya 19/11/2026, habaye imirwano hagati y’ingabo za Front pour la Refondation de la Nation (FRN) n’ihuriro ry’ingabo za Repubulika Iharanira Demokarasi ya Congo, rigizwe n’ingabo za FARDC, iz’u Burundi, imitwe ya Wazalendo ndetse na FDLR.
Iyi mirwano yabereye mu bice by’imisozi ya Rurambo, muri Teritwari ya Uvira, mu Ntara ya Kivu y’Amajyepfo, mu burasirazuba bwa Repubulika Iharanira Demokarasi ya Congo.
Nk’uko amakuru MCN ikesha amasoko yayo ari muri ibyo bice abigaragaza, ibitero byatangijwe n’ihuriro ry’ingabo zishyigikiye Leta ya Kinshasa, gusa abasirikare ba FRN barabyitambika, barabirwanya ndetse basubiza inyuma ingabo zari zabigabye.
Amakuru aturuka muri ako gace avuga ko imirwano yatangiye ahagana saa sita z’amanywa, ikaba yibanze cyane mu gace kari hafi ya Gifune.
Iyi mirwano ibaye nyuma y’indi yabaye ku wa Kabiri, aho impande zombi zahuriye mu mirwano ikomeye mu gace karemeramo isoko ya Gatanu.
Amakuru MCN yakiriye ku mirwano yo kuri uwo munsi yavugaga ko ingabo za FARDC n’imitwe izifasha zasubiye inyuma, zihungira mu mashyamba ya Mwenga, ari na yo atandukanya Teritwari ya Mwenga n’imisozi ya Rurambo.
Kongera kubura kw’imirwano muri ibi bice bigaragaza ko umutekano w’ako karere ukomeje kuzamba, mu gihe impande zihanganye zikomeje guhatanira kugenzura ibice bitandukanye byo mu misozi ya Rurambo.
Minembwe Capital News (MCN)
