Rugezi: FRN Ikomeje Kugenzura Igice Kinini, Imirwano Yamaze Umunsi Wose – Menya Ibirambuye
MINEMBWE CAPITAL NEWS (MCN)
Umunsi wose wo kuri uyu wa Kane, tariki ya 19/11/2026, waranzwe n’imirwano hagati y’ingabo za Front pour la Refondation de la Nation (FRN) n’ihuriro ry’ingabo za Repubulika Iharanira Demokarasi ya Congo, mu gace ka Rugezi, gaherereye mu majyepfo ya Minembwe, mu Ntara ya Kivu y’Amajyepfo, mu burasirazuba bwa Repubulika Iharanira Demokarasi ya Congo.
Amakuru Minembwe Capital News (MCN) imaze kumenya agaragaza ko, nubwo muri aya masaha y’umugoroba imirwano isa n’iyagabanyije ubukana, impande zombi zikomeje kurebana ayingwe. Kugeza ubwo twateguraga iyi nkuru, FRN yari igikomeje kugenzura igice kinini cya Rugezi, mu gihe ihuriro ry’ingabo za Leta ya Congo n’imitwe iyishyigikiye igenzura agace gato k’aka karere.
Iri huriro rigizwe n’ingabo za FARDC, iz’u Burundi, imitwe ya Wazalendo na FDLR, ndetse n’abacanshuro bivugwa ko bakomoka mu Burayi no muri Aziya.
Mu mirwano yabaye kuri uyu wa Kane, humvikanye urusaku rw’imbunda ziremereye n’izoroheje, hanakoreshwa indege zitagira abapilote (drones), ibintu byatumye imirwano ikomeza hafi umunsi wose.
Iyi mirwano imaze iminsi ibera muri Rugezi. Gusa, ku munsi wabanje, ari wo wa Gatatu, tariki ya 18/11/2026, amakuru MCN yakiriye yavugaga ko ingabo za FARDC, iz’u Burundi hamwe n’imitwe ya Wazalendo byinjiye muri iyi mirwano ku bwinshi, aho bivugwa ko abarenga 20.000 bagize uruhare muri ibyo bikorwa. Ibyo byatumye imirwano irushaho gukaza umurego.
Mu minsi ishize, imirwano yibanze cyane mu duce two ku Wihene, Nyarurango no mu Rugomero. Icyakora, kuri uyu wa Kane, yageze no mu tundi duce twa Rugezi, turimo mu Bandinzi no kwa Sabune.
Nubwo muri aya masaha imirwano isa n’iyagabanyije ubukana, impande zihanganye ziracyamiranye mu bice bitandukanye by’aka karere.
Minembwe Capital News (MCN)
