Umuyobozi wa Komisiyo y’umuryango wa AU yanenze guverinema ya Perezida Félix Tshisekedi yanze kuganira na M23.
Yanditswe na: Bruce Bahanda, kw’itariki 26/06/2023, saa 1:20pm, kumasaha ya Bukavu na Minembwe.
Umukuru wa Komisiyo y’ubumwe bw’Umuryango wa AU( Afrika yunze ubumwe), Moussa Faki Mahamat, yanenze guverinema ya Republika ya Demokarasi ya Congo, iyobowe na Perezida Félix Tshisekedi, kuba yaranze kwicarana ngo ikirane Ikiganiro n’umutwe w’inyeshamba wa M23.
Uyu muyobozi mu kiganiro yagiranye na Jeune Afrique, yasabwe kuvuga aho iyi komisiyo ihagaze kuri raporo y’impuguke z’Umuryango w’Abibumbye ishinja Leta y’u Rwanda gufasha M23 mu burasirazuba bwa RDC.
Faki yasubije ati: “Uburasirazuba bwa RDC bufite ibibazo kuva mu binyejana byinshi birenga bibiri. Hari imitwe yitwaje intwaro myinshi, imitwe y’abagizi ba nabi. U Rwanda ruvuga ko aba-FDLR, abasize bakoze Genoside basigaye, bibera muri RDC, bamwe bashyizwe mu gisirikare cy’igihugu cya Republika ya Demokarasi ya Congo.”
Kuri RDC, uyu muyobozi yagize ati: “Congo ku ruhande rwayo ivuga ko hari ubufasha butaziguye u Rwanda ruha M23. Ni urugero rw’icyo twita intambara zifashisha izindi mbaraga.”
Faki yavuze ko ikibazo gihari ari uko ubutegetsi bwa RDC bwanze kuganira na M23. Ati: “Kimwe mu bibazo bihari ni uko Leta ya RDC yanze kuganira na M23, iyifata nk’umutwe w’iterabwoba. Gusa iki kibazo kiri gushakirwa igisubizo mu mishyikirano ya Nairobi.”
Yavuze ko amahanga amwe n’amwe n’imiryango mpuzamahanga yamaze kugaragaza uruhande ahagazemo muri iki kibazo, gusa komisiyo ya AU yo ibona uburyo bwatuma igisubizo kiboneka ari ibiganiro.
