Perezida Félix Antoine Tshisekedi, yiyemeje guhangana nabashumba bo muri Eklezia Gatolika.
Yanditswe na: Bruce Bahanda, kw’itariki 26/06/2023, saa 4:30pm, Kumasaha ya Bukavu na Minembwe.
Perezida Félix Tshisekedi, wa Repubulika ya Demokarasi ya Congo (RDC), yiyemeje guhangana avuye inyuma n’abashumba bakuru bo muri Eklezia Gatolika basanzwe bari mu gihugu ayoboye cya RDC.
Ni ijambo, Perezida Félix Tshisekedi, yavuze tariki 25/06/2023 ubwo yari muri misa yo kwizihiza isabukuru ya Musenyeri Bernard Kasanda yabereye mu mujyi wa Mbuji-Mayi mu ntara ya Kasai-Oriental.
Umukuru w’igihugu Perezida Félix Tshisekedi, wa Republika ya Demokarasi ya Congo, yavuze ko itorero/idini rifite inshingano zinini zogufasha guverinema.
Ati: “Nizera ko guverinema hamwe n’idini by’umwihariko Eklezia Gatolika, bifite inshingano, mbisubiremo neza ‘inshingano’ ni devoire cangwa home work, yo gukorana, kugendera hamwe. Nko muri iki gihe twitegura amatora, itorero rikwiye gukorera mu Banyekongo, ribiba urukundo, ubumwe n’uburinganire.”
Perezida Tshisekedi yavuze ko ariko aba bashumba batandukiriye inshingano zabo, baca Abanyekongo mo ibice.
Ati: “Bamwe muri mwe mwahisemo ikibi gishobora kudutandukanya. Ntabwo nzemera ko bibaho.”
Perezida Félix Antoine Tshisekedi, yateguje aba bashumba ko azabarwanya, atitaye ku bo ari bo. Ati: “Nzarwanya nta kuzuyaza Umunyekongo wese uzahungabanya umutekano n’ituze by’igihugu. Sinzita ku byo abantu bazabivugaho: guhohotera ikiremwamuntu, kwambura ubwisanzure.”
Tshisekedi atangaje aya magambo nyuma y’aho inama y’abepisikopi muri RDC, CENCO, itangaje ko imyiteguro y’amatora muri iki gihugu iri kugenda nabi, bityo ko ifite impungenge ko hazaba imvururu mu gihe hatagira igikosorwa.
