Abasore 14 b’Abanyamulenge Bari Bafungiwe i Kinshasa Bafunguwe Nyuma y’Igihe Kinini Babazwa ku Buzima Bwabo
Amakuru aturuka mu murwa mukuru wa Repubulika Iharanira Demokarasi ya Congo, Kinshasa, aravuga ko abasore 14 b’Abanyamulenge bari bamaze igihe bafungiwe muri gereza zo muri uwo mujyi bamaze gufungurwa.
Aya makuru yemejwe na Jacques Kongolo, umuvugizi wa Perezida Félix Tshisekedi mu by’umutekano. Mu butumwa yanyujije ku rubuga rwa Twitter (ubu ruzwi nka X), yatangaje ko abo basore bamaze kurekurwa bagashyikirizwa umuryango uhuza Abanyamulenge batuye i Kinshasa.
Mu butumwa bwe yagize ati:
“Abasore 14 b’Abanyamulenge bari bafungiwe i Kinshasa, bahoze mu mutwe wa MRDP–Twirwaneho, twabashyikirije umuryango wa Mutualité y’Abanyamulenge i Kinshasa.”
Yakomeje anavuga ko Leta ikomeje ibikorwa bya gisirikare mu Burasirazuba bw’igihugu, agaragaza ko akarere ka Minembwe na ko kari hafi gusubizwa mu maboko y’ingabo za Leta.
Nk’uko amakuru yizewe aturuka i Kinshasa abyemeza, iki gikorwa cyo kurekura abo basore cyabaye ku mugoroba wo kuri uyu wa Kane tariki ya 05/03/2026. Nyuma yo kurekurwa, bahise bashyikirizwa abagize umuryango w’Abanyamulenge batuye i Kinshasa kugira ngo babafashe gusubira mu buzima busanzwe.
Amateka yabo agaragaza ko aba basore bishyikirije ingabo za Repubulika Iharanira Demokarasi ya Congo (FARDC) mu kwezi kwa cumi na kumwe 2025. Icyo gihe bari bamaze kuva mu mutwe wa MRDP–Twirwaneho nyuma yo kuvuga ko bananiwe n’ubuzima bwo kuba mu mashyamba.
Bivugwa ko bageze ku birindiro bya FARDC biherereye ku Murambya, ku Ndondo muri groupement ya Bijombo, aho biyambuye intwaro bakiyunga ku ngabo za Leta bavuga ko bashaka gusubira mu buzima busanzwe.
Nyuma y’ukwezi kumwe gusa bageze muri FARDC, abo basore bajyanywe mu mujyi wa Uvira. Aho bageze, bahise bafungwa n’inzego z’umutekano.
Nyuma yaho, bajyanywe mu murwa mukuru w’u Burundi, ari wo Bujumbura, mbere yo koherezwa mu ndege ibajyana i Kinshasa. Bageze i Kinshasa bafungirwa muri gereza zizwi cyane ari zo Makala na Ndolo Military Prison.
Amakuru aturuka ku babakurikiranye avuga ko mu gihe bari bafunzwe, inzego z’umutekano zababazaga ibibazo byinshi bijyanye n’ubuzima bari babayemo mbere yo kwishyikiriza FARDC, imikorere ndetse n’imiterere y’imitwe yitwaje intwaro ikorera mu misozi ya Kivu y’Epfo.
Kurekurwa kw’aba basore 14 gufatwa nk’intambwe ishobora gufasha mu kugabanya umwuka mubi umaze igihe uri hagati y’abaturage b’Abanyamulenge n’inzego zimwe za Leta ya Congo, cyane cyane mu bijyanye n’ibibazo by’umutekano n’imitwe yitwaje intwaro ikorera mu Burasirazuba bw’igihugu.
Abayobozi b’umuryango w’Abanyamulenge i Kinshasa bavuga ko bagiye gukomeza gukurikirana ubuzima bw’abo basore kugira ngo bashobore gusubira mu buzima busanzwe, mu gihe hakomeje ibiganiro ku buryo bwo kugarura amahoro arambye mu bice bya Kivu y’Epfo, by’umwihariko mu karere ka Minembwe.
Ibi bibaye mu gihe uburasirazuba bwa Repubulika Iharanira Demokarasi ya Congo bukomeje kurangwa n’imirwano ihuza ingabo za Leta n’ihuriro Alliance Fleuve Congo (AFC/M23), ibintu bituma ikibazo cy’umutekano n’ubwiyunge bw’amoko bikomeza kuba ingorabahizi mu gushakira amahoro arambye muri ako karere.
