AFC/M23 irashinja Leta ya Kinshasa gusahura umutungo wa Leta muri Kivu y’Amajyepfo
Ihuriro Alliance Fleuve Congo/M23 ryatangaje ko ku wa gatatu tariki ya 03/12/2025, habaye inama ikomeye yabereye i Goma, iyobowe na Corneille Nangaa, Umuyobozi wa Politiki w’iri huriro, afatanyije na Bertrand Bisimwa, ushinzwe politiki, imiyoborere, amategeko n’imibanire n’amahanga.
Nk’uko bitangazwa n’iri huriro, iyo nama yitabiriwe n’abayobozi bakuru n’abandi bayobozi b’iryo huriro, ikaba yaragaragayemo raporo y’iperereza ryakozwe n’Umugenzuzi Mukuru w’Imiyoborere, Rigobert Amani Kabasha, yerekana uburyo hatangiye gukorwa isesagurwa rikabije ry’imitungo ya Leta i Bukavu, mu Ntara ya Kivu y’Amajyepfo.
Iyo raporo yagaragaje ko ubutegetsi bwa Kinshasa bwateguye kandi buyobora ibikorwa byo kwambura Leta imitungo itimukanwa, ibintu bifatwa nk’icyitegererezo cya politiki yo gusahura no kunyereza umutungo rusange. Raporo ivuga ko: Inzu 102 zidafite ibyangombwa bifatika; Inzu 20 zasenywe hakoreshejwe inyandiko mpimbano; Ibintu by’agaciro 138 biri mu mutungo bwite wa Leta byacurujwe mu buryo bunyuranyije n’amategeko.
Iri tangazo risoza rishinja ubuyobozi bwa Kinshasa gucuruza iyo mitungo ya Leta hakoreshejwe inyandiko z’impimbano, mu buryo bunyuranyije n’amabwiriza agenga umutungo wa Leta.
AFC/M23 irasaba abaturage n’inzego bireba gukurikirana iki kibazo no guhagurukira kurwanya ubusahuzi buvugwa ko bukomeje kwangiza umutungo w’igihugu.
