AFC/M23 Yahamije Ko Ibikorwa Byayo mu Gisirikare Bidashobora Gusubira Inyuma
Corneille Nangaa, uhagarariye ihuriro Allience Fleuve Congo (AFC/M23), yatangaje ko ibikorwa by’iri huriro mu bya gisirikare bidashobora gusubira inyuma, kandi ko bitazigera bikurwaho cyangwa bihagarikwa.
Yagize ati:
“Twatangiriye Bunagana, uyu munsi turi Goma, Bukavu ndetse turi hafi ya Maniema. Ndagira ngo mbizeze mu izina rya AFC/M23 ko nta gusubira inyuma cyangwa kwikura aho tugenzura. Ntimukemere ibihuha n’itangazamakuru ry’ibinyoma.”
Ibi byatangajwe mu gihe akarere k’uburasirazuba bwa Repubulika Iharanira Demokarasi ya Congo (RDC) gakomeje gucicikanamo intambara, aho ingabo za AFC/M23 zihanganye n’iza FARDC zifatanyije n’ingabo z’u Burundi, ndetse n’imitwe yitwaje intwaro nka Wazalendo, FDLR, n’Imbonerakure zikorana n’ubutegetsi bwa Getega.
Uruhare rwa AFC/M23 muri Goma na Bukavu rugaragaza ubushobozi bwo kugenzura imihanda, ibice by’ingenzi by’ubucuruzi n’itumanaho, ibintu bishobora kugira ingaruka zikomeye ku mutekano n’imibereho y’abaturage b’ako karere.
AFC/M23 yashinzwe mu 2023, igizwe n’imitwe myinshi harimo umutwe wa M23, ikaba igamije gukomeza gushyira igitutu ku gisirikare cya RDC ndetse no gushyiraho iherezo ryanyuma ubutegetsi bwa Perezida Tshisekedi.
Nk’uko Nangaa abivuga, ibikorwa by’iri huriro biracyakomeje mu turere dukurikira:
Goma: Umurwa mukuru wa Kivu y’Amajyaruguru, ufite uruhare rukomeye mu bucuruzi, itumanaho n’imiyoborere y’intara.
Bukavu: Umurwa mukuru wa Kivu y’Epfo, uzwiho ubuhinzi n’ubucuruzi, ikaba ari ikibanza cy’ingenzi mu miyoborere y’intara.
Maniema: Intara ikungahaye ku mabuye y’agaciro, ifite uruhare runini mu bukungu bwa RDC.
Corneille Nangaa yatanze kandi ubutumwa bukomeye ku baturage bwo kudakurikira amakuru atariyo, asobanura ko hari ibinyoma bikwirakwizwa bigamije guhungabanya umutekano n’icyizere cy’abaturage bafitiye iri huriro. Yongeyeho ko AFC/M23 ihamye, itazigera isubira inyuma, kandi igenzura ibice by’ingenzi by’akarere.
Uyu munsi, M23 igaragaza ko itakiri ku rugero rwo gusubira inyuma mu bikorwa byayo, ikomeza kwiyerekana nk’umutwe ukomeye kandi ufite ubushobozi bwo kugenzura no guhindura byinshi mu burasirazuba bwa RDC ndetse no mu gihugu cyose muri rusange.
