AFC/M23 Yamaganye Imyitwarire ya Leta ya Kinshasa ku Kurwanya FDLR
Mu itangazo ryihutirwa ryashyizwe ahagaragara n’ihuriro rya Alliance Fleuve Congo (AFC/M23), rigenewe abaturage ba Repubulika Iharanira Demokarasi ya Congo (RDC) ndetse n’umuryango mpuzamahanga, hagarutswe ku byo uyu mutwe uvuga ko ari imyitwarire iteye impungenge ya Leta ya Kinshasa. Iyi myitwarire ivugwaho gukomeza gukorana n’umutwe wa FDLR mu gihe yari yasezeranyije kuwurwanya no kuwusenya burundu.
AFC/M23 ivuga ko ubutegetsi bwa Kinshasa bukomeje kugaragaza kudafata inshingano no gukoresha uburyarya, aho bushyira abarwanyi ba FDLR ku mirongo yose y’urugamba. Ibi ngo binyuranyije n’amasezerano bwagiranye n’impande zitandukanye yo kuwurandura burundu. Nk’uko bikomeza bivugwa muri iri tangazo, ibi bifatwa nko kwica ku mugaragaro agahenge kari karashyizweho ndetse n’amasezerano mpuzamahanga agamije kugarura amahoro mu burasirazuba bwa RDC.
Uyu mutwe ukomeza uvuga ko ibitero bikorwa n’ingabo za Leta zifatanyije n’imitwe ziyunzeho, irimo na FDLR, bikomeje guteza umutekano muke ukabije. Uvuga ko abaturage b’inzirakarengane bakomeje kwicwa, inzu zabo zigatwikwa, ndetse ibihumbi by’imiryango bikava mu byabo bigahungira ahandi mu buzima bugoye.
AFC/M23 ishimangira ko uburyo bw’intambara bushyirwa mu bikorwa na Leta ya Kinshasa, burimo n’ikoreshwa ry’indege zitagira abapilote (drones) n’intwaro ziremereye, bukomeje kongera ubukana bw’ibibazo by’ubutabazi. Ibi ngo bituma abaturage benshi basigara badafite aho bikinga cyangwa ibyo kurya, bikiyongera ku bibazo byari bisanzweho, bityo ubuzima bwabo bukarushaho kuzamba.
Uyu mutwe urangiza usaba umuryango mpuzamahanga kudakomeza kurebera ibi bibazo, uvuga ko igihe kigeze ngo hafatwe ingamba zihamye zo kurengera abasivili no kugarura amahoro arambye. AFC/M23 yongeye gushimangira ko ifite inshingano yo kurinda abaturage, ikavuga ko izakomeza gukora ibishoboka byose kugira ngo ibagezeho umutekano.
Umutwe wa FDLR (Forces Démocratiques de Libération du Rwanda) umaze imyaka irenga 30 mu burasirazuba bwa RDC, aho washinzwe ahanini n’abahoze mu ngabo za Leta y’u Rwanda n’Interahamwe bagize uruhare muri Jenoside yakorewe Abatutsi mu 1994. Kuva icyo gihe, uyu mutwe wagiye ushinjwa ibikorwa by’urugomo birimo kwica abasivili, gufata ku ngufu abagore no gusahura imitungo y’abaturage.
Leta ya RDC n’imiryango mpuzamahanga byagiye kenshi byiyemeza guhashya FDLR, ariko ibikorwa byo kuyirwanya bikunze kugenda biguru ntege. Rimwe na rimwe, hanavugwa imikoranire idasobanutse hagati yayo n’ingabo za Leta.
Mu myaka ya vuba, by’umwihariko kuva umutwe wa M23 wongeye kubura mu 2021, ikibazo cy’umutekano mu burasirazuba bwa RDC cyarushijeho gukomera, aho impande zitandukanye zishinjanya gukorana n’imitwe yitwaje intwaro, ibintu bikomeje guteza impagarara mu karere kose.
Ibi birego bishya bya AFC/M23 byiyongera ku bindi bimaze igihe bivugwa ku mikoranire ishobora kuba iri hagati y’ingabo za RDC n’umutwe wa FDLR. Nubwo Leta ya Kinshasa itabyemera, ibi bikomeje gutuma habaho kutizerana hagati y’impande ziri mu makimbirane, bikabangamira inzira y’amahoro.
Mu gihe abaturage bo mu burasirazuba bwa RDC bakomeje guhura n’ingaruka zikomeye z’iyi ntambara, amaso akomeje guhanga ku muryango mpuzamahanga, usabwa kugira uruhare rufatika mu guhagarika ihohoterwa no kugarura ituze rirambye muri aka karere.
