AFC/M23 Yatangaje Bidasubirwaho ko Nta Gace na Kamwe Igenzura Izongera Kuvamo
Mu gihe umutekano ukomeje guhungabana mu bice by’uburasirazuba bwa Repubulika Iharanira Demokarasi ya Congo (RDC), ihuriro Alliance Fleuve Congo (AFC/M23), ritavuga rumwe n’ubutegetsi bwa Leta, ryatangaje ko nta gace na kamwe rigenzura rizongera kuvamo.
Mu itangazo ryashyizwe ahagaragara ku wa Mbere tariki ya 26/01/2026, umuvugizi wa AFC/M23, Lawrence Kanyuka, yatangaje ko iri huriro ryiyemeje kuguma ku butaka ryamaze gufata, burimo imijyi ya Goma na Bukavu, ifatwa nk’ingenzi mu ntara za Kivu ya Ruguru na Kivu y’Amajyepfo. Iri tangazo ryakurikiye amagambo y’ingabo za Leta ya RDC (FARDC) zatangaje ku tariki ya 23/01/2026, zishinja AFC/M23 gutegura umutekano muke mu duce bavuga ko izavamo.
Kanyuka yagize ati: “Nta gace na kamwe tugenzura tuzongera kuvamo.” Yakomeje avuga ko iki cyemezo kigamije “gushyira imbere inyungu z’abaturage batuye mu duce twafashwe,” ashingira ku byo AFC/M23 yise “ibyemezo byafashwe n’abaturage byo kwiyunga n’inzego zayo z’umutekano n’imiyoborere.”
AFC/M23 ni ihuriro rya gisirikare na politiki rikomoka ku mutwe wa March 23 Movement (M23), rizwi kandi ku izina rya Congo River Alliance. Uyu mutwe umaze igihe uhangana n’ubutegetsi bwa Leta ya RDC, cyane cyane mu bice by’uburasirazuba bw’igihugu, aho intambara imaze imyaka myinshi iteza umutekano muke.
Mu mwaka ushize wa 2025, M23 n’uruhande rwa Leta bahanganye basinye amasezerano yo guhagarika imirwano mu biganiro byabereye i Doha muri Qatar, hagamijwe gushaka umuti urambye w’ibibazo by’umutekano muke mu karere k’ibiyaga bigari. Icyakora, nubwo ayo masezerano yari ategerejweho kugarura ituze, ishyirwa mu bikorwa ryayo ryakomeje kugorwa n’imbogamizi zitandukanye.
Mu minsi ishize, AFC/M23 yatangiye gushyiraho inzego zayo z’ubutabera mu duce igenzura, harimo no gutoranya abacamanza bashya, ivuga ko bigamije “kugarura ubutabera mu baturage.” Ibi bikorwa byamaganywe n’inzego za Leta ya RDC ndetse n’abashinzwe umutekano, bavuga ko binyuranyije n’amategeko y’igihugu.
Iri tangazo rya AFC/M23 rije mu gihe ibiganiro by’amahoro bigamije gushaka umuti urambye w’umutekano muke muri RDC bikomeje guhura n’imbogamizi zituruka ku kutizerana hagati y’impande zihanganye. Nubwo hari intambwe yatewe mu gushyiraho amasezerano yo guhagarika imirwano mu bihe bishize, ayo masezerano yakomeje kunengwa kubera kutubahirizwa ku ngingo zimwe na zimwe.
Guhera mu ntangiriro z’umwaka wa 2025, M23 yatangiye kwigarurira imijyi ikomeye nka Goma na Bukavu, ibintu byatumye Leta ikaza umutekano ikoresheje n’intambara yo mu kirere, harimo gukoresha drones n’indege z’intambara za Sukhoi-25, bigatuma ibisasu bigwa mu baturage. Hari kandi ubuhamya bw’abaturage bo muri utu duce bugaragaza ko imirwano yateje ibibazo bikomeye by’ubuzima, ubuhunzi n’imibereho mibi ku baturage basanzwe bahatuye.
Iki cyemezo cya AFC/M23 cyo kudasubira inyuma mu bice igenzura cyakajije umwuka mubi hagati yayo na Leta ya Kinshasa, kikaba kigaragaza ko urugendo rwo kugera ku mahoro n’ituze rurimo inzitizi nyinshi, nubwo hakomeje gutangwa imbaraga mu biganiro bigamije kugarura amahoro arambye.
