M23 iri gukoza imitwe y’intoki ku mujyi wa Goma.
Umutwe wa M23 umaze igihe uhanganye n’ihuriro ry’Ingabo zirwana ku ruhande rwa Leta mu ntara ya Kivu Yaruguru, wafashe uduce turi mu marembo y’umujyi wa Goma, nk’uko amakuru ava muri ibyo bice abivuga.
Muri iki gitondo cyo ku Cyumweru tariki ya 26/01/2025, mu bice byo muri teritware ya Nyiragongo, ibyari bigize igihe biberamo ihangana rikomeye hagati ya M23 n’ihuriro ry’Ingabo za RDC, byazindutse biberamo urugamba rukomeye hagati y’izo mpande zombi, birangira uyu mutwe ubifashe.
Amakuru Minembwe.com imaze kwakira yizewe avuga ko “iri ihuriro ry’ingabo za Leta riri guhunga riva mu bice byo muri grupema ya Kibumba ho muri teritware ya Nyiragongo.”
Nyuma y’aho iryo huriro rikijijwe n’amaguru rihunga muri ibyo bice byo muri teritware ya Nyiragongo, abarwanyi b’uyu mutwe wa M23 bahise babyigarurira.
Ibyo bice birimo Kanyamahoro, Mutaho, Rusayo na Kanyarucinya. Bikaba bizwi ko ibyo bice biherereye mu marembo y’umujyi wa Goma ufatwa nk’umurwa mukuru w’i Ntara ya Kivu y’Amajyaruguru.
Aya makuru anavuga kandi ko ihuriro ry’Ingabo za RDC, imbunda ryifashishaga zikomeye mu gukumira umutwe wa M23 udafata umujyi wa Goma, ryazishinguye, uzihungishiriza muri uwo mujyirwagati.
Kuri ubu abarwanyi b’uyu mutwe bakomeje kurwana berekeje i Goma.
Umuvugizi wa M23 muri iki gitondo, yatanze ubutumwa amenyesha ihuriro ry’Ingabo za RDC ko zigomba kwibuka ko amasaha 48 barihaye ryo kuba ryarambitse imbunda hasi, yegereje.
Avuga ko uyu mutwe wa M23 ushaka kubohora abaturage ba Goma bagize igihe bababaye, kandi ko abo baturage akaga bagizemo igihe bagatewe n’ingabo z’iki gihugu cya Repubulika ya demokarasi ya Congo (FARDC).
