Amakuru avugwa kuri Gen.Rushaba mu misozi ya Uvira.
Rushaba wahawe ipeti rya General ari hawe n’umutwe wa Mai-Mai ikorera mu misozi iri hejuru y’umujyi wa Uvira muri Kivu y’Amajyepfo, akaba ari nawe ubereye uwo mutwe umuyobozi mukuru, yiyunze kuri Twirwaneho, nk’uko amakuru ava muri ibyo bice abivuga.
Ni amakuru yatangiye kuvugwa kuva mu ntangiriro z’uku kwezi turimo, nyuma yuko umvugizi w’uyu mutwe uyobowe na Gen.Rushaba abitangaje.
Icyo gihe uwo muvugizi yagize ati: “Ikibazo dufite ni Mai-Mai igikorera mukwahwa kwa Lt.Gen. Pacifique Masunzu na Justin Bitakwira umwungirije. Naho twe i grupe yo kwa Rushaba twiyunze kuri Twirwaneho ya Gen Charles Sematama.”
Yanzemo kandi ati: “Ubu tugiye kurwanya Leta ya perezida Felix Tshisekedi.”
Mu ntangiriro z’iki cyumweru turimo, ni bwo abarwanyi bashorewe na General Rushaba bitandukanyije n’umutwe wa Gumino uwo bari basanzwe bakorana byahafi, bava aho bari bari mu Gitoga bahita berekeza ahitwa mu Ifunda.
Aka gace ko mu Ifunda gaherereye hafi ya Kageregere irimo Twirwaneho na Gitoga iyasigayemo n’abarwanyi bo mu mutwe wa Gumino bayobowe na Fureko uwo bavuga ko ari icyegera cya Nyamusaraba uyoboye uwo mutwe wa Gumino.
Ikitaramenyekana ni impamvu ituma uyu Rushaba adahita yiyunga ngo bavange abarwanyi b’uyu mutwe we n’aba Twirwaneho.
Kurundi ruhande bikavugwa ko yaba akirimo gushakisha ko uyu mutwe wa Gumino nawo wiyunga ku wa Twirwaneho, ndetse kandi hari abarwanyi be bataritandukanya n’abarwanyi bo muri uyu mutwe wa Gumino. Muri ubwo buryo akaba yanze kubasiga burundu.
Aya makuru nk’uko akomeza abivuga nuko Gumino yaha mu Gitoga yamaze kwivanga n’Imbonerakure z’u Burundi, cyo kimwe n’iri za Kajembwe ku Ndondo ya Bijombo ahari icyicaro gikuru cya Nyamusaraba.
Ariko kandi hari andi amakuru ataragenzurwa neza avuga ko uyu Nyamusaraba uyoboye uwo mutwe wa Gumino yaba ari i Bujumbura, aho bivugwa ko yagiye gushaka imbaraga (ibikoresho bya gisirikare), muri ubwo buryo bikaba ari yompamvu abarwanyi be bamaze kuba umwe n’Imbonerakure z’u Burundi zisanzwe zikorera muri Kivu y’Amajyepfo ku masezerano ari hagati ya perezida Felix Tshisekedi na mugenzi we w’u Burundi, Evariste Ndayishimiye yo mu mwaka wa 2022.
Hagataho, umubare w’abarwanyi bashoboye guhagurukana na General Rushaba ntuzwi neza, ariko bivugwa ko bashobora kuba babarirwa hagati y’ijana na mirongwitanu.
