Amerika Yatanze Ibisobanuro ku Mpamvu Yikuye Burundu mu Muryango wa WHO
Leta Zunze Ubumwe za Amerika zatangaje ku mugaragaro ko zikuye burundu mu Ishami ry’Umuryango w’Abibumbye ryita ku Buzima (WHO/OMS), zishingiye ku mpamvu zirimo kubura kutabogama, kudakorera mu mucyo, gukorera mu nyungu za bimwe mu bihugu, ndetse n’imyitwarire uyu muryango wagize mu bihe by’icyorezo cya COVID-19.
Iki cyemezo cyatangajwe mu itangazo rihuriweho ryashyizwe ahagaragara n’Ubunyamabanga bwa Leta ya Amerika bushinzwe Ubuzima hamwe n’Ubunyamabanga bw’Ububanyi n’Amahanga, tariki ya 22/01/2026. Muri iri tangazo, impande zombi zasobanuye ko iki cyemezo gishingiye ku isezerano Perezida Donald Trump yari yaratanze ku munsi wa mbere agarutse ku butegetsi.
Bagize bati: “Iki cyemezo gishingiye ku ntege nke WHO yagaragaje mu gihe cy’icyorezo cya COVID-19, n’ingaruka mbi izo ntege nke zagize ku buzima rusange no ku nyungu z’Abanyamerika. Isezerano ryatanzwe rigomba kubahirizwa.”
Amerika yibukije ko nubwo ari imwe mu bihugu byashinze WHO, uyu muryango wagiye ugaragaza imyitwarire idahuye n’inshingano zawo, ugafatwa nk’uwacitse ku murongo ugamije kurengera inyungu z’ibihugu byose. Yongeyeho ko WHO yananiwe gutanga ku gihe amakuru y’ingenzi yari gufasha mu gukumira no kugabanya ingaruka z’icyorezo cya COVID-19 ku baturage ba Amerika.
Itangazo rikomeza rigira riti: “Guhera aka kanya, inkunga z’amafaranga ndetse n’abakozi ba Leta Zunze Ubumwe za Amerika bagiraga uruhare mu bikorwa bya WHO birahagaritswe burundu.”
Amakuru aturuka ku cyicaro gikuru cya WHO i Genève mu Busuwisi avuga ko ibendera rya Leta Zunze Ubumwe za Amerika ryamanuwe mu madendera y’ibihugu binyamuryango, bikaba ari ikimenyetso gifatika cyo kwitandukanya ku mugaragaro.
Uku kuva kwa Amerika gusigira WHO icyuho gikomeye, kuko Amerika yagiraga uruhare runini mu ngengo y’imari y’uyu muryango, itanga hafi 18% by’amafaranga akoreshwa mu bikorwa byawo, hiyongeraho ubujyanama, ibikoresho n’abakozi bagiraga uruhare rukomeye mu ishyirwa mu bikorwa ry’inshingano zawo ku rwego mpuzamahanga.
Perezida Donald Trump, uri mu mwaka we wa mbere agarutse ku butegetsi, yakomeje gushimangira umugambi we wo gukura igihugu cye mu miryango mpuzamahanga atemeranya na yo, ayishinja kudakorera inyungu z’Abanyamerika no kubangamira ubusugire bwa Leta Zunze Ubumwe za Amerika ku rwego mpuzamahanga.
