Byinshi kuri Erik Prince, Umunyamerika Ukomeye mu Bikorwa by’Umutekano n’Imirwano muri RDC
Umunyamerika Erik Prince, washinze sosiyete izwi ku isi mu bikorwa by’umutekano bwite ya Blackwater, yohereje abacanshuro mu Ntara ya Kivu y’Amajyepfo kugira ngo bafashe ingabo za Repubulika Iharanira Demokarasi ya Congo(FARDC) kurwanya ihuriro Alliance Fleuve Congo, AFC/M23.
Erik Prince, uzwi kandi ku izina rya Dean Prince, ni umucuruzi w’Umunyamerika n’umusirikare w’inararibonye wigeze kuba mu mutwe wihariye w’ingabo za Leta Zunze Ubumwe za Amerika, U.S. Navy SEALs. Yashinze sosiyete ya Blackwater Worldwide mu mwaka wa 1997, igamije gutanga serivisi z’umutekano wihariye mu bihugu birimo Irak na Afghanistan. Iyi sosiyete yaje kumenyekana ku rwego mpuzamahanga kubera uruhare rwayo mu bikorwa by’intambara no kurinda abashoramari n’abayobozi bakuru.
Erik Prince yavutse ku itariki ya 06/06/1969 i Holland, muri Leta ya Michigan, muri Leta Zunze Ubumwe za Amerika. Yize muri Hillsdale College, aho yakuye ubumenyi bw’ibanze mu bijyanye n’imiyoborere n’ubucuruzi. Nyuma yo kurangiza amasomo ye, yinjiye mu gisirikare cya U.S. Navy SEALs, ahakura ubunararibonye bukomeye mu bikorwa by’umutekano n’intambara.
Mu 1997, Prince yashinze Blackwater Worldwide, sosiyete y’umutekano bwite yakoranye n’ibihugu ndetse n’ibigo by’abikorera ku rwego mpuzamahanga. Yagize uruhare rukomeye mu kurinda abayobozi n’abashoramari mu bihugu birimo intambara cyangwa bifite ibikorwa by’ubucuruzi bikomeye.
Mu 2010, Prince yashinze izindi sosiyete zirimo Frontier Resource Group na Presidential Airways, zigamije ishoramari, ubwikorezi n’umutekano. Kugeza ubu, akomeje ibikorwa bye mu bijyanye n’umutekano binyuze muri sosiyete Vectus Global, ndetse no mu mishinga y’ikoranabuhanga n’umutekano ku rwego mpuzamahanga.
Erik Prince yagiye avugwaho kugira uruhare mu bikorwa bitandukanye ku rwego mpuzamahanga, birimo:
Ibikorwa byo kurwanya iterabwoba, birimo n’umuhigo wo gushakisha Osama bin Laden
Gukorera mu bihugu birimo Haiti, Libya, Mozambique, Irak, Afghanistan ndetse na RDC
Mu 2024, yasinyanye amasezerano na RDC yo kurinda amabuye y’agaciro no gufasha mu kurwanya umutwe wa M23
Prince azwiho kuba inshuti ya hafi ya Perezida Donald Trump, aho yabaye umwe mu bamugiriye inama mu by’umutekano mu gihe cya manda ye ya mbere. Mushiki we, Betsy DeVos, yabaye Umunyamabanga wa Minisiteri y’Uburezi muri Leta Zunze Ubumwe za Amerika mu gihe cy’ubutegetsi bwa Trump.
Erik Prince ni umwe mu bantu bafite izina rikomeye kandi rigibwaho impaka ku rwego mpuzamahanga mu bijyanye n’umutekano w’abikorera n’ibikorwa by’abacanshuro. Ibikorwa bye bikunze kuvugwaho cyane bitewe n’uko yakoreye mu bihugu birimo intambara, ariko kandi agaragaza ubunararibonye n’ubushobozi mu micungire y’umutekano n’ibikorwa bya gisirikare.
Hari amakuru avuga ko ashobora guhura n’imbogamizi zikomeye mu gihe yaba ahanganye n’umutwe wa M23, cyane ko uyu mutwe wigeze gutsinda abandi bacanshuro bakoreraga muri Goma. Nanone kandi, biravugwa ko abarwanyi ba Erik Prince bararwanye muri Uvira mbere y’uko AFC/M23 ihafata tariki ya 09/12/2025, ariko ntibabasha kuburizamo ifatwa ry’uwo mujyi.
