Choléra Yibasiye Abanye-Congo Bahungiye mu Burundi, Abatari bake Bamaze Gupfa
Impunzi z’Abany-Congo zahunze imirwano mu Ntara ya Kivu y’Amajyepfo zafashwe n’icyorezo cya Choléra mu nkambi ya Gatumba mu Burundi. Visi Meya wa Uvira, Kifara Kapenda, yatangaje ko abarenga 40 bamaze gupfa, abandi benshi bakeneye ubufasha bwihuse.
UNHCR ivuga ko kuva tariki ya 5 na 16/12/2025, impunzi zirenga 80,000 zaturutse mu bice birimo Kamanyola, Luvungi, Katogota na Uvira zihungira mu Burundi. Umukozi wo mu nkambi, utashatse gutangazwa amazina ye, yavuze ko impunzi zishwe n’indwara iterwa n’umwanda n’imirire mibi, ndetse ko ubuyobozi bw’u Burundi bugerageza guhisha amakuru y’abapfa.
Yashimangiye ko izi mpunzi zikeneye ibiryo, imyambaro, amazi n’ubuvuzi byihutirwa, kuko zitagira aho zirambika umusaya, zivirwa n’izuba n’imvura, kandi umunuko w’abapfa ukomeje kwiyongera mu nkambi. Imiryango mpuzamahanga ishinzwe impunzi irasabwa kugira icyo ikora vuba nabwangu.
