FARDC n’abambari bayo bongeye gutana mu mitwe na AFC/M23 muri Kivu y’Epfo.
Imirwano ikomeye hagati y’ihuriro ry’Ingabo za Repubulika ya demokarasi ya Congo n’ihuriro rya Alliance Fleuve Congo, AFC/M23 yongeye kubera mu duce two muri teritware ya Kabare muri Kivu y’Amajyepfo.
Iyi mirwano yabaye aha’rejo tariki ya 03/08/2025, ibera mu gace ka Kamakombe no mu nkengero zako muri teritware ya Kabare.
Amakuru avuga ko iyi mirwano yatangiye mu rukerera rwo ku cyumweru, aho muri kariya gace kanumvikanyemo intwaro ziremereye n’izoroheje.
Hari nyuma y’aho Uruhande rwa Leta rwari rwiyemeje gutera AFC/M23 no kuyirukana mu bice igenzura nka Katana n’ahandi.
Usibye kuba imirwano yarabereye mu bice byo muri teritware ya Kabare hafi naho ikibuga cy’indege cya Bukavu giherereye, ahandi habereye imirwano ikomeye ni muri teritware ya Walungu. Bivugwa ko uyu mutwe wa M23 wanashubije inyuma ibitero wari wagabweho n’uruhande rwa Leta bahanganye.
Imirwano hagati y’impande zombi ikomeje kubica bigacika mu Burasirazuba bw’iki gihugu mu gihe basinye amahame aganisha ku masezerano yo guhagarika intambara. Ibi izi mpande zombi zabisinyiye i Doha muri Qatar mu kwezi gushize.
Ubundi kandi bari bemeranyije agahenge gahoraho.
