FARDC yongeye kubabaza Abanyamulenge mu Minembwe nyuma y’uko ibiciye umuntu.
Abasirikare ba Congo(FARDC ) bo muri brigade ya 21, ifite icyicaro gikuru mu Minembwe, bishe barashe umusore w’i Lundu wo mu bwoko bw’Abanyamulenge, uri mu kigero cy’imyaka 19.
Bienvenue Rucagwa mwene Rucagwa wo mu muryango w’Abagorora, ni we wishwe arashwe kuri uyu wa gatandatu tariki ya 25/01/2025, akaba yishwe na FARDC.
Amakuru Minembwe.com imaze kwakira avuga ko uyu musore yarashwe igihe cya manywa yo kuri uyu munsi.
Bivugwa ko abasirikare bamwishe ubwo bari bageze mu muhana w’i wabo i Lundu, kandi ko bahise bamurasa nta n’icyo babanje ku muganiriza, bigaragaza ko yazize isura ye.
Nyuma aba basirikare bahise batangira kurasa berekeza ku mazu muri uwo muhana w’i Lundu wo mugace kitwa mu Bega.
Ari nabwo Abanyamulenge bo mu itsinda ry’irwanaho bahise birwanaho nk’uko basanzwe babikora.
Kuri ubu muri aka gace hakaba hari kumvikana imbunda ziremereye n’izito.
Ibyo bikaba byongeye gutuma abaturage baturiye ibyo bice n’inkengero zabyo bongera guhunga, abenshi berekeje mu duce duherereye mu mashyamba abandi bagana mu bihuru. Ku Cyumweru nibwo abaturage b’i Lundu bari bahunze nyuma y’aho aba basirikare ba FARDC bari bagabye igitero mu muhana w’Abanyamulenge uherereye hakurya ya Lwiko, aho ni i Gakenke.
FARDC yongeye gukora munda Abanyamulenge mu gihe hari hatarashyira ibyumweru bibiri bishe undi mu gabo uri mu kigero cy’imyaka 44, uwo biciye mu Minembwe centre.
Si nuwo gusa kuko no mu kwezi gushize hari undi mwana w’Umukobwa FARDC yiciye ahitwa ku Kabakire.
Ni mu gihe kandi mu ntangiriro z’umwaka wa 2021 hishwe abagore batandatu nabo bakaba barishwe na FARDC bicirwa i Lundu. Uretse nabo, Abanyamulenge mu Burasirazuba bwa Repubulika ya demokarasi ya Congo bagiye bicwa n’ingabo za RDC abandi bakicwa n’abarwanyi b’imitwe yitwaje intwaro ikorana byahafi na Leta ya Kinshasa. Abarwanyi bo muri iyo mitwe ibica ni Maï-Maï Bishambuke na FDLR.
Hagataho, Abanyamulenge bakomeje kurira kuko kuva mu 1964 kugeza ubu ntibarabona ubatabara. Leta ya Kinshasa yo kabatabaye n’iyo ifata umwanya wa mbere mu kubica.
