Goma: Bintou Keita yahuye n’abayobozi ba AFC/M23.
Intumwa y’Umunyamabanga mukuru w’umuryango w’Abibumbye muri Congo, akaba n’umuyobozi wa MONUSCO, Bintou Keita yahuye n’abayobozi ba kuru bihuriro rya Alliance Fleuve Congo(AFC) ribarizwamo umutwe wa M23 n’uwa Twirwaneho mu mujyi wa Goma ufatwa nk’umurwa mukuru w’i ntara ya Kivu y’Amajyaruguru.
Ku gicamunsi cyo kuri uyu wa gatanu tariki ya 13/06/2025, ni bwo uyu muyobozi wa MONUSCO yabonanye n’abayobozi ba AFC/M23 bagirana ibiganiro, aho byibanze kubirebana no gushyigikira inzira iyo ari yo yose iganisha ku gisubizo kirambye cy’umutekano n’ibibazo bya politiki iki gihugu kirimo.
Baganiriye no kuzindi ngingo zitandukanye zirimo n’izirebana no kugarura ubutegetsi bwa Leta mu Burasizuba bw’iki gihugu.
Kuri izi ngingo, AFC/M23 yashimangiye ko yiyemeje kurengera abaturage no guharanira iterambere mu bice babohoje.
Mbere y’uko Bintou Keita agera i Goma, MONUSCO yari yatangaje ko mu ruzinduko agiye kuhagirira azagirana ibiganiro n’imiryango y’abagore ikora ibikorwa by’ubutabazi, abakozi ba Loni bagikorera i Goma, ubuyobozi bw’ingabo za SADC zoherejwe kurwanya umutwe wa M23 n’ubuyobozi bwa AFC/M23.
Uru ruzinduko rwe muri iki gice kigenzurwa n’umutwe urwanya ubutegetsi bw’i Kinshasa rugaragaza impinduka mu buryo bw’imikoranire y’umuryango w’Abibumbye n’impande zihanganye muri iki gihugu.
Kugeza ubu Monusco igaragaza ko igifite ingabo zayo mu mujyi wa Goma; ivuga ko igikomeje kurinda abasivili no gushyigikira amahoro nk’uko n’ubundi ibi byagarutsweho na Bintou Keita muri iki kiganiro yagiranye na AFC/M23.
Gusa, AFC/M23 yo yakomeje gushinja Monusco gufatanya n’imitwe yitwaje intwaro yagiye igira uruhare mu guhungabanya umutekano w’abaturage mu mujyi wa Goma no mu nkengero zawo.
