Gutanga ubufasha ku Banyakongo bakomeje kuva mu byabo kubera ibibazo by’intambara harasabwa miliyoni 200 z’amadolari y’Amerika.
Ni byatangajwe n’uhagarariye ibiro bikuru bya UNHCR, muri Repubulika ya demokarasi ya Congo, Angela Dikongue Atangana, aho yavuze ko hasabwa miliyoni 200 z’amadolari y’Amerika, kugira abavanwe mu byabo kubera intarambara bafashwe.
Uyu komiseri mukuru wa Unchr muri RDC, yabitangaje kuri uyu wa Kabiri, tariki ya 12/03/2024, nyuma y’uko abakurwa mu byabo bakomeje kwiyongera, aho bahunga bava muri teritware ya Rutsuru, imazemo iminsi irimo imirwano hagati ya M23 n’ihuriro ry’Ingabo zirwana k’uruhande rwa Guverinoma ya Kinshasa.
Angela Dikongue Atangana, yagize ati: “Dukurikije abakuwe mu byabo n’intambara mu Burasirazuba bwa Repubulika ya demokarasi ya Congo, dukeneye amadorali y’Amerika arenga miliyoni 200 yo kubafasha. Umwaka ushize ntitwigeze tugera kuri 50%. By’inkunga ikenewe.”
Ntiyahwemye no gusaba ko intambara yahagarara mu Burasirazuba bw’igihugu cya RDC.
Ni mu gihe imirwano ikomeje kuja imbere, aho M23 ikomeje kwirukana ihuriro ry’Ingabo z’ubutegetsi bwa Kinshasa, ndetse ikaba inasatira yerekeza i Goma, k’u murwa mukuru w’i Ntara ya Kivu y’Amajyaruguru, no mu bindi bice byo mu yandi materitware.
Gusa Sosiyete sivile zo mu Ntara ya Kivu y’Amajyaruguru, zirashinja Ingabo z’igihugu kugira uruhare runini mu gutuma imirwano idahagarara, no kureka ibice byinshi bikomeza kwigarurirwa na M23.
MCN.
