Havuzwe imirwano ikaze kuri uyu wa Gatandatu tariki ya 24/08/2024 muri teritware ya Masisi.
Ni imirwano yabaye hagati ya M23 n’ihuriro ry’Ingabo zirwana ku ruhande rwa Leta ya Kinshasa, aho yabereye mu duce two muri teritware ya Masisi, mu Ntara ya Kivu y’Amajyaruguru, nk’uko amakuru ava muri ibyo avuga.
Ahitwa Kironko ha herereye hafi na Localite ya Buguri niho habereye iyi mirwano ikaze ya M23 n’ihuriro ry’Ingabo zirimo iza FARDC, FDLR, Wazalendo, ingabo z’u Burundi, abacanshuro na SADC.
Iyi mirwano yatangiye igihe c’isaha z’igicamunsi cyo kuri uyu wa Gatandatu, nyuma y’uko iri huriro ry’ingabo z’ubutegetsi bwa Repubulika ya demokarasi ya Congo ryagabye ibitero mu birindiro bya M23 biri muri ibyo bice.
Aya makuru avuga ko imirwano yaje gukomeza mu bindi bice, nka hitwa Muheto mu birometero 16 uvuye i Masisi ku i Zone, ndetse kandi no mu duce turimo Kisuma, Nyange, Kaniro, Lukopu na Katale, hose hagiye humvikana urusaku rw’imbunda ziremereye n’izito kuri uyu munsi.
Andi makuru yo ku ruhande avuga ko muri utu duce twabereyemo imirwano, utwinshi kuri ubu turagenzurwa n’abarwanyi ba M23.
Utwamaze ku menyekana ko twigaruriwe n’abarwanyi ba M23 ni Kisuma, Muheto n’ahandi.
Kuva mu ntangiriro z’iki Cyumweru turimo, hagiye humvikana imirwano hirya no hino muri za teritware ya Masisi, Lubero na Rutshuru. Ibi byatumye abaturage bakomeza guhunga ku bwinshi, nk’uko Sosiyete sivile yo muri ibyo bice yabitangaje.
Imiryango itegamiye kuri Leta nayo ikorera i Goma ahazwi nk’umurwa mukuru w’i Ntara ya Kivu y’Amajyaruguru, yashize inyandiko hanze igaragaza ko ihangayikishijwe n’imirwano iri kubera i Masisi, inasaba ko haba kubahiriza agahenge ka mahoro kasabwe mu biganiro by’i Luanda mu gihugu cya Angola. Ibi biganiro bikaba byarahuje u Rwanda na Congo.
MCN.
