I Mulenge: Mu Munsi Umwe, FARDC n’Ingabo z’u Burundi Zakubitiwe mu Bice Byinshi
Mu gihe umutekano ukomeje kuzamba mu misozi miremire y’i Mulenge, mu Ntara ya Kivu y’Amajyepfo mu burasirazuba bwa Repubulika Iharanira Demokarasi ya Congo, amakuru aturuka mu nzego zegereye aho imirwano ibera aragaragaza ko umutwe wa MRDP–Twirwaneho, kuri uyu wa Mbere tariki ya 06/04/2026, wakubise bikomeye ingabo za Leta (FARDC) n’abafatanyabikorwa bazo, barimo n’ingabo z’u Burundi, ubasigira igihombo gikomeye cy’ibikoresho n’abasirikare.
Amakuru yizewe yatanzwe n’umwe mu basirikare ba MRDP–Twirwaneho ukorera mu misozi miremire y’i Mulenge, utifuje ko amazina ye atangazwa kubera impamvu z’umutekano, yemeje ko kuri uyu munsi habaye imirwano ikomeye mu bice bitatu by’ingenzi, aho FARDC n’ingabo z’u Burundi zakubitiwe bikomeye.
Mu gace ka Kajembwe gaherereye ku Ndondo, muri grupema ya Bijombo, teritwari ya Uvira, uyu mutangabuhamya yavuze ko FARDC n’ingabo z’u Burundi zagabye igitero mu masaha y’igitondo, ariko zaje gusubizwa inyuma mu buryo bukomeye. Yagize ati:
“Bateye, ariko bahise batsindwa mu buryo bugaragara. Twabambuye ibikoresho byinshi bya gisirikare birimo imbunda ziremereye n’amasasu menshi, maze basubira inyuma bafite igihombo gikomeye.”
Iyo mirwano, nk’uko yakomeje abivuga, yatangiye ahagana saa tanu za mu gitondo zija gushyira hafi saa sita z’amanywa, aho ingabo za Leta n’abafatanyabikorwa bazo basubiye inyuma mu kajagari.
Si aho gusa, kuko no mu gace ka Kuwimiko kari mu nkengero za centre ya Minembwe muri teritwari ya Fizi, habereye indi mirwano ikomeye. Uwo musirikare yavuze ko FARDC n’abafatanyabikorwa bayo bagabye igitero ariko bagasubizwa inyuma vuba, bagatatana mu bihuru no mu bisambu nyuma yo kuraswaho amasasu menshi.
Yagize ati:
“Twabavunderejemo amasasu ku buryo bahise batatana; bamwe bahungira mu bihuru, abandi mu bisambu. Byari ibihe bikomeye kuri bo.”
Ibi bitero bibaye bikurikira indi mirwano yabereye i Gakenke mu masaha ya mbere y’igitondo, aho na ho FARDC n’ingabo z’u Burundi zahaburiye imbaraga n’ubwo yo yamaze igihe gito cyane. Amakuru yemeza ko iyo mirwano yahitanye abasirikare benshi ndetse ikanabasigira ibikomere bikomeye.
Akarere ka Minembwe n’utundi duce two mu misozi miremire y’i Mulenge kamaze igihe kirekire karangwa n’umutekano muke uterwa n’imitwe yitwaje intwaro itandukanye. MRDP–Twirwaneho ni umwe mu mitwe yirwanaho iharanira kurinda abaturage b’Abanyamulenge, bamaze igihe bahura n’ibibazo by’umutekano muke n’ihohoterwa rishingiye ku moko n’ubutaka.
Ku rundi ruhande, FARDC ikorana n’ingabo z’u Burundi n’indi mitwe irimo FDLR na Wazalendo n’Imbonerakure, ndetse n’ingabo z’ibihugu by’inshuti, mu bikorwa ahanini byibasira Abanyamulenge, ibintu byakomeje kongera ubukana bw’imirwano muri aka karere.
Ibitero byabaye kuri uyu munsi bigaragaza ko MRDP–Twirwaneho ikomeje kugira imbaraga mu misozi miremire, aho ifite ubumenyi bw’aho ikorera ndetse n’ubushobozi bwo guhangana n’ingabo zisanzwe. Gutsindwa kwa FARDC n’ingabo z’u Burundi muri utu duce dutandukanye mu gihe gito bishobora gusobanura intege nke mu migambi ya gisirikare cyangwa kudahabwa amakuru ahagije mbere yo kugaba ibitero.
Ku baturage b’aka karere, ibi bikorwa by’intambara bikomeje kubashyira mu kaga gakomeye, kuko akenshi ari bo bahura n’ingaruka zirimo kwimurwa, kubura ibiribwa n’umutekano muke.
Mu gihe imirwano ikomeje gufata indi ntera mu bice bya Minembwe n’i Ndondo, biragaragara ko ikibazo cy’umutekano mu burasirazuba bwa Congo gikomeje kuba ingorabahizi isaba ibisubizo bya politiki n’ibya dipolomasi birambye, aho gukomeza kwishingikiriza ku mbaraga za gisirikare zonyine.
Ibi bitero biherutse kuba bishimangira ko, nubwo ibikorwa bya gisirikare bikomeje, nta kimenyetso gifatika kiragaragaza ko amahoro ari hafi kugaruka muri aka karere kamaze imyaka myinshi karazahajwe n’amakimbirane.
