Ibindi byimbitse ku mpinduka zirimo kuba ku gisirikare cya FARDC mu misozi miremire y’Imulenge, mu Ntara ya Kivu y’Epfo.
Kuri uyu wa Kabiri abasirikare bo muri Regima ya 2202 bageze mu Minembwe bavuye i Baraka, aho baje gusimbura by’agateganyo brigade ya 12, yo ikoherezwa ku rwanya umutwe wa M23 uhanganye bikomeye n’ihuriro ry’Ingabo zirwanirira leta ya Kinshasa, mu Ntara ya Kivu y’Amajyaruguru, no muri bimwe mu bice byo muri Kivu y’Amajy’epfo, ahanini muri teritware ya Kalehe.
Iyi Regima yoherejwe mu Minembwe, mu misozi miremire y’Imulenge, mu gihe byitezwe ko ahubwo hazoherezwa Brigade ya 22 ifite abasirikare bamwe bamaze kugera Uvira aho barindiriye abandi bazaza bavuye i Kitona baciye muri Kalemie, mu Ntara ya Tanganyika. Ubwo bazaba bamaze kugera bose, aha muri Uvira, bivugwa ko ari bwo bazahita bazamuka imisozi miremire y’Imulenge baciye ku Ndondo ya Bijombo, nk’uko iy’inkuru Minembwe Capital News, tuyikesha bamwe mu basirikare ba FARDC.
Byanasobanuwe kandi ko Regima ya 3305 isanzwe ikorera i Lulimba ko yo igiye kujanwa mu Bijombo muri teritware ya Uvira, mu gihe iyari mu Bijombo ya 3301 na yo izahita yoherezwa i Lulimba.
Amakuru kandi akomeza avuga ko aba basirikare bo muri brigade ya 12 bamwe muribo bazajanwa ahitwa Numbi muri teritware ya Kalehe, mu gihe icyicaro cyayo gikuru aricyo ‘Etat Major’ kizashirwa muri Centre ya Minova, muri yi teritware ya Kalehe. Ibice bihana imbibi na teritware ya Masisi, mu Ntara ya Kivu y’Amajyaruguru.
