Iby’ikiganiro cy’ubuyobozi bwa Gatolika muri RDC na M23.
Ihuriro ry’Abepesikopi ba kiliziya gaturika muri Repubulika ya demokarasi ya Congo (CENCO) n’aba ECC bahuriye mu mujyi wa Goma bagirana ikiganiro cyihariye n’ubuyobozi bw’umutwe wa M23, aho barimo baganira ku mutekano w’u Burasirazuba bw’iki gihugu cya Congo, ndetse no gushakira umuti ikibazo cy’ubukungu cyugarije umujyi wa Goma.
Fulgence Muteba, arkepiskopi wa Diyoseze Katolika ya Lubumbashi, akaba n’umuyobozi wa CENCO hamwe na musenyeri Donatien Nshole umunyabanga mukuru wa CENCO ari nawe muvugizi w’iri huriro, nibo bayoboye iritsinda.
Ahagana mu masaha y’igitondo cy’ejo hashize itariki ya 12/02/2025, izi ntumwa nibwo zageze mu mujyi wa Goma. Aba bayobozi bakiliziya gatolika bagiranye ikiganiro cyihariye n’ubuyobozi bw’umutwe wa M23, ikiganiro cyari kigamije kwiga ku kibazo cy’u mutekano muke uri mu Burasirazuba bwa RDC. Iki kiganiro cyabereye mu mwiherero muri Hoteli Serena y’i Goma.
Ni ibiganiro kandi byari bigamije gushakira umuti ibibazo bitandukanye birimo n’iby’ubukungu ku baturage bo mu mujyi wa Goma. Umunyabanga mukuru wa CENCO akaba n’umuvugizi w’iri huriro mu kiganiro yahaye abanyamakuru ibi biganiro bisojwe yumvikanishije ko kuri bo uyu ari umwanya ukomeye wo kugerageza guhuza impande zihanganye mu kureba uburyo amahoro n’umutekano birambye byaboneka muri RDC.
Kuri we kuba M23 iri mu barebwa cyane n’ikibazo cy’umutekano, byari ngombwa ko nabo babaganiriza bakumva icyo bagitekerezaho. Yongeraho kuba uburasirazuba bwa RDC bugaragaramo ibibazo by’intambara z’urudaca bikomeza gutera impungenge kiliziya gaturika n’indi miryango mpuzamahanga.
Donatien Nshole yongeyeho ko ubutumwa bagenda bageza ku nzego zitandukanye haba iza leta n’iza sosiyete sivili ndetse no kuba bahuye na M23 buri wese agomba gukora ibishoboka mu kugarura amahoro arambye.
Ikindi mu byari byitezweho ni uburyo ikibuga cy’indege cya Goma cyafungurwa ibikorwa bigakomeza yewe no gufungura inzira y’amazi ku bikorwa bihuza umujyi wa Goma na Bukavu muri Kivu y’Amajy’epfo.
Bamwe mu banyapolitiki bo muri RDC bavuga ko kuba kiliziya gaturika yinjiye muri iki kibazo bishobora gutanga icyizere ko igisubizo ku kibazo cy’u mutekano muke uri mu Burasirazuba bwa RDC gishobora kubonerwa umuti.
Izi ntumwa za kiliziya zageze mu mujyi wa Goma nyuma yo guhura n’umukuru w’igihugu Cya RDC Félix Tshisekedi mu Cyumweru gishize. Ibiganiro bagiranye byibanze n’ubundi ku mutekano w’abaturage bo mu Burasirazuba bw’iki gihugu aho usanga ibice byinshi haba muri Kivu y’Amajy’epfo n’iyi Yaruguru birimo intambara.
