Ifoto Yavugishije Isi, Tshisekedi na Hariana mu Rujijo Rw’Itangazamakuru Mpuzamahanga
Amashusho yafatiwe i Washington D.C mu cyumweru gishize, agaragaza Perezida wa Repubulika Iharanira Demokarasi ya Congo, Félix Antoine Tshisekedi Tshilombo, ari kumwe n’umunyamakuru Hariana Verás Victória, yakomeje gukwirakwira ku mbuga nkoranyambaga, anatera impaka ndende mu banyapolitiki, abanyamakuru n’abasesenguzi b’ibibazo mpuzamahanga.
Aya mashusho agaragaza aba bombi bahuje umusaya mu mwanya usa n’utamenyerewe hagati y’umukuru w’igihugu n’umunyamakuru usanzwe uzwi cyane mu gukurikirana politiki mpuzamahanga, by’umwihariko ibibazo by’umutekano muke mu karere k’Ibiyaga Bigari bya Afurika.
Hariana Verás Victória, ukomoka muri Angola, amaze igihe kinini avugwa cyane mu bitangazamakuru mpuzamahanga kubera uburyo akoramo itangazamakuru buvugwaho kubogamira kuri Leta ya RDC, cyane cyane mu gihe abaza abayobozi ba Leta Zunze Ubumwe za Amerika ku bibazo bijyanye n’intambara n’umutekano muke mu burasirazuba bwa Congo.
Mu minsi ishize, uyu munyamakuru yakunze kugaragara mu biganiro n’abanyamakuru ba White House, abaza ibibazo bisa n’ibirengera ubuyobozi bwa Kinshasa, ibintu byatumye anengwa n’impirimbanyi nyinshi z’uburenganzira bwa muntu, zimushinja kudaha umwanya uhagije ijwi ry’abaturage n’amashyirahamwe yigenga yerekana ihohoterwa rikorerwa abasivili mu burasirazuba bwa RDC.
Nubwo nta tangazo ryemewe ryasohowe n’ibiro bya Perezida Tshisekedi cyangwa na Hariana Verás ubwe risobanura neza icyo iyo foto ishingiyeho, abasesenguzi benshi bayifashe nk’ikimenyetso cy’umubano wa hafi utera kwibaza ku bwisanzure n’ubwigenge bw’itangazamakuru mpuzamahanga.
Bamwe mu banyamakuru n’abakurikirana politiki bavuga ko iyo myitwarire ishobora kugabanya icyizere rubanda ifitiye itangazamakuru, cyane cyane mu bihe isi ikeneye amakuru atabogamye ku makimbirane yo mu burasirazuba bwa RDC amaze imyaka irenga makumyabiri ahitana imbaga y’abasivili.
Kuva mu myaka yo hambere, intambara zo mu burasirazuba bwa RDC zakomeje kuba isoko y’amakuru akomeye ku itangazamakuru mpuzamahanga. Ariko kandi, zagiye zigaragaramo ingaruka za politiki, inyungu z’ibihugu bikomeye n’ibigo mpuzamahanga, bigatuma amakuru atangwa atajya ahora ahuza n’ukuri ku miterere y’ibiri kubera ku butaka.
Ni muri urwo rwego, impaka zijyanye n’uruhare rw’itangazamakuru, uburyo ribaza ibibazo n’aho rihagaze mu makimbirane, zikomeje kwiyongera, by’umwihariko iyo hagaragaye ibimenyetso by’uko hari abanyamakuru bashobora gufatwa nk’abegereye ubutegetsi aho kuba abahagarariye inyungu rusange.
Abasesenguzi barasaba ko ibyabaye bigirwa isomo, bityo itangazamakuru rikongera kwiyemeza gukorera mu mucyo, mu bwisanzure no mu kuri, cyane cyane ku bibazo byugarije ubuzima bwa za miliyoni z’abaturage bo mu burasirazuba bwa RDC.
Mu gihe amakimbirane yo mu karere k’Ibiyaga Bigari akomeje kuba ikibazo mpuzamahanga, isi irasabwa kudasuzugura uruhare rw’itangazamakuru mu kubaka amahoro, aho kuba igikoresho cya politiki cyangwa inyungu zihishe.
