Igitero cya Drones za FARDC i Minzenze Gishyira Mu Rujijo Umutekano w’Abasivili, AFC/M23 Ishinja Kinshasa Ibyaha by’Intambara
Ihuriro Alliance Fleuve Congo (AFC/M23) ryashinje ubutegetsi bwa Repubulika Iharanira Demokarasi ya Congo (DRC) gukomeza kwibasira abaturage b’abasivili, nyuma y’igitero cy’indege zitagira abapilote (drones) cyagabwe muri centre ya Minzenze, mu Ntara ya Kivu y’Amajyepfo, kigahitana abaturage benshi b’inzirakarengane.
Nk’uko byatangajwe n’iri huriro, iki gitero cyabaye ku wa Gatandatu, tariki ya 24/01/2026, nyuma ya saa sita, kigabwa n’ihuriro ry’ingabo z’ubutegetsi bwa Kinshasa zirimo FARDC, mu gikorwa AFC/M23 ivuga ko cyarenze ku mategeko mpuzamahanga arengera abasivili mu bihe by’intambara.
Mu butumwa yanyujije ku rubuga rwa X (yahoze ari Twitter) kuri iki Cyumweru, Laurence Kanyuka, umuvugizi wa AFC/M23, yatangaje ko ubutegetsi bwa Kinshasa bukomeje gukoresha politiki y’urugomo igamije gutera ubwoba no guhohotera abaturage.
Yagize ati:
“Ubutegetsi bwa Kinshasa bukomeje ubudahwema gukurikiza politiki y’urugomo buhumyi ikorerwa abasivili, gusenya imitungo yabo no guhonyora uburenganzira bw’ikiremwamuntu, mu gihe umuryango mpuzamahanga ukomeje guceceka.”
Yakomeje avuga ko igitero cy’i Minzenze ari urugero rugaragara rw’uko Kinshasa idaha agaciro ubuzima bw’abantu, ndetse ko ikwiye kwamaganwa n’amahanga n’inzego mpuzamahanga.
Minzenze ni agace gaherereye muri Teritwari ya Kalehe, mu Ntara ya Kivu y’Amajyepfo, kamaze igihe kari mu bice byibasiwe n’intambara n’ubushyamirane bukomeje kuranga uburasirazuba bwa DRC. Aka gace kazwiho guturwa n’abaturage benshi b’abasivili bishingikiriza ku buhinzi n’ubucuruzi buto, bityo kakaba kibasirwa cyane n’ingaruka z’imirwano.
Mu myaka yashize, Minzenze n’ibindi bice bya Kalehe byagiye bigabwaho ibitero bitandukanye by’imitwe yitwaje intwaro, ingabo za leta ndetse n’indi mitwe ifatanya na FARDC, ibintu byatumye abaturage benshi bahunga, abandi bagapfa bakanatakaza n’imitungo yabo.
Umutwe wa M23, ubu uri mu ihuriro AFC (Alliance Fleuve Congo), wongeye kugaruka ku mugaragaro mu mpera za 2021, ushinja ubutegetsi bwa Kinshasa kutubahiriza amasezerano y’amahoro, by’umwihariko ayasinywe mu 2013, no gukomeza guhohotera abaturage bamwe mu burasirazuba bwa Congo.
Kuva icyo gihe, intambara yakomeje gufata indi ntera, aho impande zombi zagiye zishinjanya kwica abasivili, kurenga ku ihagarikwa ry’imirwano no kudaha agaciro amategeko mpuzamahanga agenga intambara, by’umwihariko amategeko arengera abasivili (International Humanitarian Law).
AFC/M23 yatangaje ko itazahwema gusaba iperereza ryigenga mpuzamahanga ku gitero cy’i Minzenze, kugira ngo hamenyekane ukuri ku byabaye, abakoze ibyaha babiryozwe, ndetse n’abasirikare cyangwa abayobozi baba babigizemo uruhare bagezwe imbere y’ubutabera.
Iri huriro ryongeye gushimangira ko gukoresha drones n’intwaro ziremereye mu bice bituwe n’abasivili ari icyaha gikomeye gishobora gufatwa nk’icyaha cy’intambara, rikaba risaba Umuryango Mpuzamahanga kudakomeza kurebera ahubwo ugafata ingamba zifatika zo kurengera abasivili bo mu burasirazuba bwa DRC.
