Ihuriro ry’Ingabo za Leta ya RDC n’Abafatanyabikorwa Baryo Ryasubijwe Inyuma Bikomeye mu Mirwano mu Kalingi
Amakuru yizewe aturuka mu misozi miremire y’i Mulenge, muri teritwari ya Mwenga mu ntara ya Kivu y’Amajyepfo, mu burasirazuba bwa Repubulika Iharanira Demokarasi ya Congo (RDC), aravuga ko kuri iki Cyumweru habaye imirwano ikomeye yahuje ihuriro ry’ingabo za Leta ya Kinshasa n’umutwe wa MRDP-Twirwaneho ufatanyije na M23.
Iyo mirwano yahuje ingabo za FARDC zifatanyije n’abafatanyabikorwa bazo barimo ingabo z’u Burundi, umutwe wa Wazalendo, abarwanyi ba FDLR, abacanshuro baturutse mu bihugu bitandukanye ndetse n’Imbonerakure z’u Burundi, bahanganye n’umutwe wa MRDP-Twirwaneho ufatanyije na M23.
Nk’uko amakuru aturuka muri ako gace abivuga, imirwano yabereye mu gace ka Kalingi kari mu birometero bike uvuye mu mujyi muto wa Minembwe, umwe mu duce tw’ingenzi dutuwemo n’Abanyamulenge benshi.
Bivugwa ko ihuriro ry’ingabo za Leta ya RDC ari ryo ryatangije igitero, rigamije kugaba ibitero mu mihana ituwe n’Abanyamulenge ndetse no ku birindiro bya MRDP-Twirwaneho n’abafatanyabikorwa babo muri ako gace.
Icyakora, amakuru aturuka ku batuye hafi y’aho imirwano yabereye avuga ko MRDP-Twirwaneho ifatanyije na M23 yahise itabara byihuse, ikarwanya ibyo bitero, bikarangira abasirikare ba Leta ya Kinshasa n’abafatanyabikorwa babo basubijwe inyuma.
Amakuru ava muri ako gace avuga ko ingabo zagabye ibitero zahahuriye n’uruva gusenya, aho bivugwa ko zatakaje umubare munini w’abasirikare ndetse n’ibikoresho bya gisirikare.
Mu bikoresho bivugwa ko byatakarijwe muri iyo mirwano harimo imbunda, amasasu n’ibindi bikoresho bya gisirikare byasizwe ku rugamba ubwo abasirikare basubizwaga inyuma.
Amakuru akomeza avuga ko igitero cyaturutse mu bice bya Mutunda na Bicumbi, aho abasirikare b’uruhande rwa Leta ya Kinshasa bari baturutse mbere yo kwinjira mu gace ka Kalingi.
Kugeza ubu, amakuru aturuka mu baturage n’andi masoko yo muri ako gace avuga ko MRDP-Twirwaneho na M23 bakomeje kugenzura Kalingi n’inkengero zaho.
Iyi mirwano yo ku Cyumweru ije ikurikira indi yabaye ku wa Gatandatu mu duce twa Gakenke, kwa Barabona no kwa Chef Rutaganda, na ho muri Minembwe.
Amakuru avuga ko icyo gihe ihuriro ry’ingabo za FARDC, Wazalendo, FDLR, abacanshuro, Imbonerakure z’u Burundi, ndetse n’ingabo z’u Burundi n’iza Angola bagabye ibitero bikomeye kuri MRDP-Twirwaneho.
Ariko na bwo ayo makuru avuga ko ibyo bitero byarangiye abasirikare ba MRDP-Twirwaneho babasubije inyuma bikomeye.
Umwe mu bantu watanze amakuru yavuze ko nyuma y’iyo mirwano yiboneye imirambo myinshi y’ingabo z’u Burundi, avuga ko yabarirwaga mu mirongo.
Akarere ka Minembwe kamaze imyaka myinshi kari mu bibazo by’umutekano muke, bitewe n’imirwano ihoraho ihuza imitwe yitwaje intwaro itandukanye.
Uyu mujyi utuwemo cyane n’Abanyamulenge, Abanyekongo bavuga ururimi rw’Ikinyarwanda batuye mu misozi ya Kivu y’Amajyepfo kuva mu myaka myinshi ishize.
Mu myaka yashize, MRDP-Twirwaneho yashinzwe igamije kurinda abaturage b’Abanyamulenge, mu gihe Leta ya Kinshasa na yo ishyigikirwa n’indi mitwe irimo Wazalendo n’indi yahoze ari inyeshyamba.
Ku rundi ruhande, umutwe wa M23 wagaragaye cyane mu ntambara zo mu burasirazuba bwa RDC kuva mu 2012, ndetse wongeye kubura imirwano mu 2021, aho ukomeje kugenzura ibice byinshi byo mu ntara ya Kivu y’Amajyaruguru n’iy’Amajyepfo.
Kugeza ubu, imirwano iracyakomeje mu bice bitandukanye by’uburasirazuba bwa Congo, ibintu bikomeje gutera impungenge ku mutekano w’abaturage no ku ituze ry’akarere muri rusange.
