Imirwano Ikaze muri Kivu y’Amajyepfo Hagati ya AFC/M23 na FARDC, Wazalendo, Ingabo z’u Burundi na FDLR
Mu gitondo cyo kuri uyu wa Gatandatu, tariki ya 07/02/2026, teritwari ya Mwenga yongeye kuba indiri y’imirwano ikaze yahanganishije ingabo za Repubulika Iharanira Demokarasi ya Congo (FARDC), Wazalendo, ingabo z’u Burundi, n’ihuriro Alliance Fleuve Congo (AFC/M23), mu gace ka groupement Mukangala, muri chefferie ya Luindi.
Nk’uko amakuru yizewe aturuka ku baturage baho ndetse n’inzego z’umutekano abivuga, iyi mirwano yatangiye ahagana saa yine za mu gitondo, ikomeza kugeza saa kumi z’umugoroba. Impande zombi zakoresheje intwaro zitandukanye, zirimo iziremereye n’izoroheje, bituma abaturage b’ako gace bahunga, berekeza mu mashyamba no mu bice bituranye kugira ngo barokore ubuzima bwabo.
Amakuru ava mu nzego z’aho aravuga ko, nyuma y’amasaha menshi y’imirwano ikaze, AFC/M23 yabashije kwigarurira umudugudu wa Chafunda, ihirukana ihuriro ry’ingabo za RDC ryari ryarahashinze ibirindiro. Ibi byafashwe nk’intambwe ikomeye ku ruhande rwa AFC/M23, cyane ko Chafunda ifite umwanya w’ingenzi mu buryo bw’igisirikare n’ubwikorezi muri ako gace.
Nubwo hataratangazwa imibare nyayo y’abapfuye cyangwa abakomeretse, hari amakuru avuga ko uruhande rwa Leta rwagize igihombo gikomeye, mu gihe ibikorwa by’ubuzima n’ubucuruzi byahagaze muri ako gace.
Teritwari ya Mwenga imaze igihe kinini ibarizwa mu duce twibasiwe n’umutekano muke mu ntara ya Kivu y’Amajyepfo. Iyi mirwano ihoraho ishingiye ku mpamvu zitandukanye zirimo iz’amoko, ubutaka, n’imitungo kamere.
Ihuriro AFC/M23, ryongeye kwiyubaka mu myaka mike ishize, rihora rihangana n’imitwe yitwaje intwaro yaho irimo Wazalendo, FDLR n’ingabo za FARDC n’iz’u Burundi zisanzwe zikorana bya hafi na FARDC.
Abaturage ba Mukangala na Luindi bavuga ko bakomeje kubaho mu bwoba, basaba Leta ya Congo n’umuryango mpuzamahanga gushyira ingufu mu kugarura amahoro arambye. Bamwe muri bo batangaza ko imirwano nk’iyi ituma abana batiga, ubuhinzi bugahagarara, kandi ubuzima bukarushaho kuba bubi.
Mu gihe hataramenyekana igikorwa kizakurikiraho ku mpande zihanganye, ifatwa rya Chafunda na Wazalendo rifatwa nk’ikimenyetso cy’uko intambara mu burasirazuba bwa RDC ikomeje gufata indi ntera, mu gihe amahoro akiri kure.
