Impunzi z’i Uvira Zivugwaho Gukorerwa Ihohoterwa Rikabije mu Burundi, Polisi Ishinjwa Gukoresha Imbaraga Zirenze Urugero
Amakuru aturuka mu gace ka Gatumba, ku mupaka w’u Burundi na Repubulika ya Demokarasi ya Congo (RDC), aravuga ko impunzi zaturutse mu mujyi wa Uvira zihunze intambara n’umutekano muke, zakorewe ihohoterwa rikabije n’inzego z’umutekano z’u Burundi, bikavugwa ko bamwe bahasize ubuzima.
Nk’uko byemezwa n’abatangabuhamya, aba baturage bari bahungiye mu Burundi bashakaga kwinjizwa mu nkambi z’impunzi cyangwa se gusubizwa muri RDC, ariko barabyangirwa. Icyo cyemezo cyateje umwuka mubi n’ubushyamirane hagati yabo n’abapolisi bari bashinzwe umutekano muri ako gace.
Abaturage bari aho bavuga ko Polisi y’u Burundi yakoresheje imbaraga zarenze urugero, ikubita bamwe muri izo mpunzi mu buryo bukomeye. Umwe mu bahohotewe bikabije, bivugwa ko yakubiswe igiti mu ijosi, yahise apfira aho, abandi bagakomereka bikomeye.
Ibi byabaye mu gihe izi mpunzi zavugaga ko zibasiwe n’inzara n’ubwigunge, zisaba gufashwa nk’uko amategeko mpuzamahanga arengera impunzi abiteganya. Bavugaga ko ubuzima bwabo bwari mu kaga, bityo bagasaba ahantu hizewe ho kujanwa n’ubufasha bw’ibanze.
Ibi bikaba bikomeje guteza impungenge n’impaka zikomeye ku rwego mpuzamahanga, by’umwihariko ku myitwarire y’inzego z’umutekano ku mpunzi zishakisha ubuhungiro mu bihugu by’abaturanyi. Imiryango iharanira uburenganzira bwa muntu yasabye ko hakorwa iperereza ryigenga kandi ridafite aho ribogamiye, hagamijwe kumenya ukuri ku byabaye, kubiryoza ababigizemo uruhare no kurenganura abahuye n’ihohoterwa, hakirindwa ko ibyabaye byasubira.
Abasesenguzi bemeza ko iki kibazo kigaragaza ihungabana rikomeje kwiyongera mu karere k’Ibiyaga Bigari, aho intambara zo mu Burasirazuba bwa RDC zikomeje gusiga abaturage mu kaga, bityo hakenewe ibisubizo bihuriweho n’ibihugu n’imiryango mpuzamahanga mu kurengera ubuzima n’icyubahiro by’impunzi.
