Inteko Ishinga Amategeko ya Amerika Igiye Kwiga ku Mahoro Arambye Hagati ya RDC n’u Rwanda

Inteko Ishinga Amategeko ya Amerika Igiye Kwiga ku Mahoro Arambye Hagati ya RDC n’u Rwanda

Inteko Ishinga Amategeko ya Leta Zunze Ubumwe za Amerika, ibinyujije muri Komisiyo ishinzwe Ububanyi n’Amahanga, yatangaje ko hateganyijwe inama rusange iziga ku cyerekezo cy’amahoro n’umutekano mu karere k’Ibiyaga Bigari, by’umwihariko ishingiye ku mubano uri hagati ya Repubulika Iharanira Demokarasi ya Congo (RDC) n’u Rwanda.

Iyo nama izayoborwa na Komisiyo yihariye ishinzwe Afurika, iyobowe na Depite Chris Smith (R–New Jersey). Izaterana ku wa Kane tariki ya 22/01/2026, guhera saa munani z’amanywa (2:00 p.m.), mu cyumba cya 2172 kiri mu nyubako ya Rayburn House Office Building i Washington, D.C. Abatazaba bahari bazashobora kuyikurikirana imbonankubone (live webcast) binyuze ku rubuga rw’iyi Komisiyo.

Ingingo nyamukuru izaganirwaho izaba ifite umutwe ugira uti: “Guteza Imbere Amahoro muri RDC n’u Rwanda hifashishijwe Amasezerano ya Washington ya Perezida Trump.” Aya masezerano afatwa nk’ishingiro rishya ry’ubuhuza n’imikoranire, agamije gushakira akarere amahoro arambye hashingiwe ku bufatanye mu bya dipolomasi, umutekano n’iterambere rirambye.

Mu bazatanga ubuhamya hitezwe Madamu Sarah Troutman, Umuyobozi wungirije ushinzwe Afurika muri Minisiteri y’Ububanyi n’Amahanga ya Leta Zunze Ubumwe za Amerika. Azatanga isesengura ryimbitse ku ruhare rwa Amerika mu gushimangira amahoro, kugabanya amakimbirane no gushyigikira ibiganiro bya politiki mu karere.

Abategura iyi nama batangaje ko hashobora no kwitabazwa abandi batanga ubuhamya mu gihe byaba bibaye ngombwa, hagamijwe gutanga ishusho yuzuye ku bibazo by’umutekano, ku mubano w’ibihugu, ndetse no ku ngamba zafatwa mu gukemura amakimbirane amaze igihe mu burasirazuba bwa RDC.

Iyi nama ifatwa nk’intambwe ikomeye igaragaza ubushake bwa Leta Zunze Ubumwe za Amerika bwo gukomeza kugira uruhare rufatika mu guharanira amahoro, ituze n’iterambere mu karere ka Afurika yo hagati, aho umutekano wa RDC n’u Rwanda ugira ingaruka zikomeye ku mutekano w’akarere kose ndetse n’uw’isi muri rusange.