Leta Zunze Ubumwe z’Amerika zongereye iminsi ya gahenge, ku ntambara ibera mu Burasirazuba bwa RDC.
Ni kuri uyu wa Kane tariki ya 18/07/2024; leta Zunze Ubumwe z’Amerika zatangaje ko agahenge hagati ya M23 n’ihuriro ry’Ingabo zirwana ku ruhande rwa leta ya Kinshasa, kongerewe ho iminsi 15.
Aka gahenge kari katangiye ku itariki ya 05/07/2024, kandi gatangwa hagamijwe ahanini kugira ngo abaturage bahunze intambara bahabwe ubufasha bitagoranye.
Muri icyo gihe, Amerika yavuze ko aka gahenge gashyigikiwe na leta ya Kinshasa ndetse n’iya Kigali, kandi ko zishyigikiye kugira ngo abaturage babone ubutabazi bwihuse.
Umuvugizi w’ibiro bya leta Zunze Ubumwe z’Amerika bishinzwe ububanyi n’amahanga, Matthew Miller, kuri uyu wa 17/07/2024, yatangaje ko aka gahenge kongerewe ho iminsi 15, asaba impande zirebwa na ko ku kubahiriza.
Yagize ati: “Amerika yakiriye neza inyongera y’iminsi 15 ku gahenge hagati y’impande zihanganye mu Burasirazuba bwa RDC kandi turasaba abo mu karere bose kubahiriza.”
Yanavuze kandi ko Amerika uzakomeza gukorana byahafi na Guverinoma ya Congo, iy’u Rwanda na Angola, hashyingiwe ku myanzuro ya Luanda na Nairobi kugira ngo haboneke igisubizo kirambye cy’aya makimbirane.
Aka gahenge kasabwe ubwo umutwe wa M23 wari umaze gufata ibice biri muri teritware ya Lubero nka hitwa Kirumba no mu nkengero zaho.
Gusa aka gahenge nti kubahirijwe kuko ihuriro ry’Ingabo z’ubutegetsi bwa Repubulika ya demokarasi ya Congo ryakomeje kugaba ibitero bya hato nahato kuri uyu mutwe wa M23, bigamije kwirukana uyu mutwe mu bice wafashe.
Ahagana ku ya 14/07/2024, umuvugizi wa M23 mu bya gisirikare, Lt Col Willy Ngoma, yatangaje ko ihuriro ry’Ingabo rya leta ya Kinshasa ryagabye ibitero mu birindiro byabo biherereye mu gace ka Kirumba, hafi na Kanyabayonga.
Yagize ati: “Kuva saa kumi n’imwe na 40 z’igitondo, ihuriro rya leta , ryagabye igitero ku birindiro byacu bya Kirumba. AFC/M23 nk’ibisanzwe yirwanyeho, irinda abaturage kinyamwuga.”
Impande zihanganye zakunze gushinjanya kutubahiriza ay’amasezerano, kuko no ku itariki ya 10/07/2024, umuvugizi w’igisirikare cya RDC mu Ntara ya Kivu Yaruguru, Lt Col Ndjike Kaiko, yavuze ko umutwe wa M23 wabagabyeho ibitero ku birindiro byabo bya Nyange na Mpati, muri teritware ya Masisi.
MCN.
