M23 ikomeje gukubita ahababaza ihuriro ry’ingabo za RDC.
Imirwano yongeye kuremerera ihuriro ry’Ingabo zirwanirira ubutegetsi bwa perezida Félix Tshisekedi, muri teritware ya Lubero mu ntara ya Kivu Yaruguru, mu burasirazuba bwa Repubulika ya demokorasi ya Congo.
Ahar’ejo tariki ya 28/12/2024, imirwano ikaze hagati ya M23 n’ihuriro ry’Ingabo za RDC yabereye mu misozi ihanamiye umujyi muto wa Alimbongo.
Iyi misozi yabereyemo imirwano ikomeye, iherereye hagati ya Alimbongo na Mambasa; ikaba iri nko mu birometero 60 na centre ya teritware ya Lubero.
Aya makuru avuga ko ibituruka byinshi, kuri uwo wa gatandatu byatangiye kumvikana igihe c’isaha z’igitondo cya kare bigeza ku gicamunsi. Ni mu gihe uruhande rwa Leta, bivugwa ko ari rwo rwatangiye kugaba ibitero mu birindiro bya M23, nayo ikarusubiza, maze haba ihangana rikomeye.
Nk’uko bivugwa iriya mirwano yari mibi ku ruhande rurwanirira Leta ya Kinshasa, ni mu gihe rwarashwe birangira rukwiye imishwaro, ndetse bamwe muri rwo bafatwa mpiri abandi bagwa ku rugamba.
Iyo mirwano ikaba yaraje ikurikira indi nanone yabaye kuva mu ntangiriro z’iki cyumweru kugeza ku wa gatanu.
Ibyumweru bitatu biri hafi kurangira muri Lubero hari intambara ikomeye, kandi uyu mutwe wa M23 ugenda wigarurira uduce two muri yo, buri uko urwanye urugamba, nk’uko amakuru avuga.
