M23 yafashe akandi gace k’ingenzi ko muri Lubero.
Umutwe wa M23 wongeye kwambura ihuriro ry’Ingabo zirwanirira ubutegetsi bwa perezida Félix Tshisekedi agace gaherereye muri teritware ya Lubero mu ntara ya Kivu y’Amajyaruguru muri Repubulika ya demokarasi ya Congo.
Ni agace kafashwe mu masaha y’igitondo cyo ku Cyumweru tariki ya 03/11/2024. Aka gace kitwa Kamandi Gite gaherereye mu birometero birenga 130 uvuye mu majyaruguru y’umujyi wa Goma.
M23 yafashe Kamandi Gite nyuma y’uko yarimo yirwanaho ubwo ihuriro ry’Ingabo za RDC ryari ryayigabyeho igitero. Imirwano yavuzwe kandi mu ijoro ryo ku kuri iki Cyumweru muri teritware ya Masisi, mu gace ka Kahira.
Abaturage batanze aya makuru bavuze ko urusaku rw’imbunda rwumvikanye cyane kugeza ku cyambu cya Kamandi.
Umujyi wa Kamandi Gite, utuwe n’abaturage 35.000; amakuru yifatwa ry’uyu mujyi muto ariko wingenzi kuko uhuza indi mijyi ukaba unakorerwamo ubucuruzi bw’indagara, yatanzwe n’abawuturiye .
Ku rundi ruhande amakuru atangwa n’abanyabuzima bo muri ibyo bice avuga ko M23 yigaruriye ako gace nyuma yokurasa imbunda ziremereye, ariko ko ntaguhangana gukomeye kwabayeho hagati y’impande zihanganye.
Ndetse umwe mu bagize Sosiyete sivile wo muri Kamandi Gite yabwiye itangaza makuru ko abarwanyi ba M23 bari abantu babarirwa mu magana, bafite ibikoresho bihagije, kandi ko byagaragara ko bashaka gukomeza baja i Butembo.
Kamandi Gite iherereye ku nkombe z’ikiyaga cya Edward, ni inzira igana muri teritware ya Beni. Iyi mirwano yongeye gutuma abaturage bongera guhunga bata ibyabo, nk’uko byagiye biba mu ntambara zo mu myaka ibiri ishize.
