M23 yongeye kurasa ibabaza ihuriro ry’Ingabo z’ubutegetsi bwa Repubulika ya demokarasi ya Congo, mu nkengero za centre ya Kanyabayonga muri teritware ya Rutshuru, mu Ntara ya Kivu y’Amajyaruguru.
Ni mu mirwano yongeye kubura kuri iki gicamunsi cyo kuri uyu wo ku Cyumweru, tariki ya 02/06/2024, hagati ya M23 n’ihuriro ry’Ingabo zirwana ku ruhande rwa leta ya perezida Félix Tshisekedi, nk’uko amasoko yacu abivuga.
Ay’amakuru avuga ko iyi mirwano ko irimo kubera mu gace ka Bulindi kari mu ntera y’ibirometre nka 10 uvuye muri centre ya Kanyabayonga, ahari ibirindiro bikomeye by’Igisirikare cya RDC, Ingabo z’u Burundi, abacanshuro, SADC, FDLR na Wazalendo.
Muri iyi mirwano harimo kumvikanamo imbunda ziremereye n’izito kandi ko M23 iri kuyigaragazamo ubuhanga bwo ku rwana ku rwego rwo hejuru, nk’uko Minembwe Capital News yabwiwe n’abaturage baturiye ibyo bice.
Amakuru twahawe n’umwe mu barwanyi ba M23, ariko utashatse ku menyekana amazina yavuze ko muri aka gace ka Bulindi kari kuberamo intambara, kamaze kubonekamo imirambo y’ingabo zo ku ruhande rwa leta ya Kinshasa igera muri 75.
Ibi bibaye mu gihe no ku munsi w’ejo hashize, aha muri ibi bice hari habereye kandi urugamba rukomeye.
Mu gihe mu nkengero za Kanyabayonga urugamba rukomeje kuja imbere, no mu bice bya Mubambiro hari kumvikanamo imbunda zarutura; aha nihafi na centre ya Sake ahagize igihe habera intambara ikomeye hagati ya M23 n’ihuriro ry’Ingabo zirwana ku ruhande rwa leta.
Tu bibutsa ko mu nkengero za centre ya Kanyabayonga hamaze iminsi irenga ine habera intambara ikomeye, hagati y’impande n’ubundi zigize igihe zihanganye(M23 & ihuriro ry’Ingabo za RDC). Ndetse muri iyi mirwano M23 imaze kuyifatamo ibice byinshi byo muri teritware ya Rutshuru na Masisi ibyambuye iri huriro ry’Ingabo za Repubulika ya demokarasi ya Congo.
MCN.
