Muri ibi bihe Abanyamulenge bibuka ababo baguye mu Bibogobogo, hari byo basaba kugira ngo imitima yabo iruhuke.
Ni ku nshuro ya 28 hibukwa Abanyamulenge bo mu Bibogobogo bakabakaba 400, biciwe mu duce dutandukanye two mu nkengero z’umujyi wa Baraka no muri Baraka.
Agace ka Bibogobogo kagizwe n’i Mihana y’abo mu bwoko bw’Abanyamulenge irenga 15 irimo Mugorore 1, Mugorere ya Kabiri, Bikirikiri, Bivumu ya 1 n’iya 2, Magaja n’indi. Aka gace gaherereye mu ntera y’ibirometro bike uvuye mu Burasirazuba bw’ikiyaga cya Tanganyika; ka kaba kandi nko mu birometero biri hagati ya 60-70 uvuye mu Muhana munini w’i Mulenge ari wo Minembwe.
Tariki ya 18 na 19/09/196, nibwo Abanyamulenge bo mu Bibogobogo bakusanyirijwe hamwe bikozwe n’ingabo zahoze ari za Perezida Mobutu (Faza), ku bufasha bw’interahamwe n’imitwe ya Maï Maï yo mu bwoko bw’Ababembe. Ubuhamya bwatanzwe na Albert Semukeha, uri mu bashinzwe gutegura kw’ibuka aba bishwe bazira uko Imana yabaremye, buvuga ko “abakusanyirijwe hamwe bari 700, aho abana n’ababyeyi babo batandukanyijwe, ababyeyi baricwa.” Avuga ko iz’i ngabo za Mobutu, Interahamwe na Maï Maï bageze mu Bibogobogo kwica aba Banyamulenge bavuye i Baraka na Uvira.
Abanyamulenge bafashwe baricwa, ahanini bari abo mu Mihana ya Bivumu 1, kwa Matare, Kubera, Magaja 1 na Magaja ya 2. Ubuhamya buvuga kandi ko bafatwaga bagashyirwa mu nsengero abandi bakarindirwa hanze ku bibuga, kandi ko nta mahirwe yari ahari yo guhunga kuko babaga bazengurutswe n’interahamwe na Maï Maï n’ingabo zo kwa Mobutu. Uduce bajanwe kwicirwamo ni Lweba,Baraka, Mboko na Kamanyola.
Uretse abana, abantu bakuru bafashwe bari bageze 300, muri aba, abagera kuri 200 bari abagore ndetse bivugwa ko benshi mbere y’uko bicwa babanjye gusambanywa ku ngufu abandi bajanwa bunyago. Abagore batanu gusa n’umugabo umwe nibo barokotse mu buryo bw’ibitangaza by’Imana. Mu bana bafashwe bivugwa ko bari 159 aho abagera 146 bahise bajanwa bunyago, boherezwa mu makambi y’Ababembe ya Nyarugusu muri Tanzania, abandi 13 biciwe i Baraka. Gusa mu bajyanywe bunyago muri Tanzania, batandatu muribo bamaze kuboneka ndetse baranatashye bahura n’imiryango yabo, abandi 140 ntibaramenyekana irengero ryabo, ariko ubuhamya buvuga ko aba bana baba mu miryango y’Ababembe.
Biri mu bituma abanya-Bibogobogo basaba ko haba ubufasha kugira ngo hashakwe aba bana, ati: “Icyizere kirahari, kuko aba bana batashye hari amakuru bavuga, bikumvikana ko n’abandi boboneka.” Mu mategeko mpuzamahanga arengera ikiremwamuntu; nk’ingingo ya 7,10,20,9 n’iya 13, zisaba buri gihugu gufata ingamba zo gukumira no kurwanya ibura ry’abantu hakoreshwe imbaraga, kuko bihanishwa ibihano bikakaye. Leta ya Kinshasa yari ibifite mu nshingano zayo zo kwemeza ko aba bana babuze bashakwa ariko ntiyabikoze kuko ari Abanyamulenge.
Muri raporo ya Mapping yo mu 2005, igaragaza umuyobozi wo muri Leta ya Kinshasa, witwa Kalimba wo mu bwoko bw’Ababembe uheruka kwitaba Imana; igaragaza ko yari yasabye imitwe ya Maï Maï guhamburura imibiri y’Abanyamulenge yishwe icyo gihe bakayita mu kiyaga cya Tanganyika. Ibi bikaba byari mu rwego rwo kugira ngo bazimize ibimenyetso byose bigaragaza ko Abanyamulenge bo mu Bibogobogo biciwe i Baraka no mu nkengero zayo, nka hitwa Kabera n’ahandi.
Abanyamulenge, muri iki gihe bunamira ababo bishwe bazira uko Imana yabaremye, baributsa abayobozi b’ibihugu n’imiryango mpuzamahanga gukora iperereza ry’imbitse kugira ngo bashakishe abana 140 bajyanywe bunyago muri Tanzania, no guhabwa imiryango yabo.
Ubundi kandi aba Banyamulenge bo mu Bibogobogo barasaba ko hakubakwa inzibutso zizafasha ku ibuka amakuba bagize mu 1996. Bibutsa kandi urubyiruko guharanira kurwanya akarengane gakorerwa Abanyamulenge mu Burasirazuba bwa Repubulika ya demokarasi ya Congo.
MCN.
