Perezida Tshisekedi yazamuye mu ntera abasirikare bakuru 2 yashyinguye aha’rejo.
Perezida wa Repubulika ya demokarasi ya Congo, Felix Tshisekedi, yazamuye mu ntera General Peter Cirumwami Nkuba na Colonel Alexis Rugabisha, bamaze amezi arindwi bapfiriye ku rugamba ingabo z’iki gihugu zihanganyemo n’ihuriro rya Alliance Fleuve Congo, AFC/M23/MRDP mu Burasirazuba bwa Repubulika ya demokarasi ya Congo.
Aha’rejo ku wa mbere tariki ya 01/09/2025, ni bwo perezida Felix Tshisekedi yashyinguye mu cyubahiro Major Gen Peter Cirumwami Nkuba na Colonel Alexis Rugabisha.
Uyu Cirumwami yahoze ari guverineri w’i ntara ya Kivu y’Amajyaruguru yarasiwe mu gace kitwa Kasengesi tariki ya 23/01/2025, ni mu gihe yari yasuye ingabo ayoboye zari ku rugamba, aho zari zihanganye na AFC/M23/MRDP mu mujyi wa Sake . Akaba yari yagiye kuzitera akanyabugabo.
Naho Colonel Rugabisha Alexis yapfiriye mu mirwano yabereye i Nyabibwe, muri teritware ya Kalehe mu ntara ya Kivu y’Amajyepfo.
Ku wa mbere rero, Tshisekedi yayoboye umuhango wo ku basezera bwanyuma.
Mu rwego rwo kububaha, ashingiye ku bubasha afite, nk’umugaba w’Ingabo z’iki gihugu cya RDC, Tshisekedi yafashe icyemezo cyo kuzamura mu ntera General Peter Cirumwami Nkuba, amuha ipeti rya Lieutenant General, na ho Rugabisha Alexis wari Colonel amugira Brigadier General.
Ubwo yabazamuraga yagize ati: “Nshingiye ku mikorere myiza n’ubutwari bwabaranze ku rugamba, bagapfa barwanira igihugu cyatewe n’ubashotoranyi mu Burasirazuba, bashyizwe ku ipeti rya Lieutenant General na Brigadier General.
Ubundi kandi yashyize Lieutenant Gen Cirumwami mu cyiciro cy’intwari z’igihugu kirimo Laurent Desire Kabila wayoboye RDC kuva mu 1997 kugeza mu 2001 na Patrice Lumumba wabaye minisitiri w’intebe w’iki gihugu mu 1960.
Umurambo wa Cirumwami na Rugabisha yari ibitswe mu buruhukiro bw’ibitaro byitiriwe Colonel Tshatshi i Kinshasa. Yashinguriwe mu irimbi ry’abasirikare riri muri komine ya Nsele.
