RDC: Abantu babarirwa mu mirongo bishwe na korera(cholera).
Mu murwa mukuru wa Repubulika ya demokarasi ya Congo, ari wo Kinshasa, abantu 78, byatangajwe ko bishwe na Cholera, mu gihe abandi amagana bayirwaye.
Byatangajwe na minisiteri y’ubuzima y’iki gihugu cya RDC, yavuze ko indwara ya cholera iterwa n’umwanda imaze guhitana abantu 78 muri 830 bayanduye.
Ku wa mbere w’iki cyumweru, minisitiri w’ubuzima wa RDC, yari yatangaje ko igipimo cy’abapfa mu banduye iyi ndwara kiri ku 9,4%.
Ni mu gihe no mu nama iheruka y’abaminisitiri b’iki gihugu, yari yabasonuriye ko mu turere tw’ubuvuzi 35 tugize i Kinshasa, 25 ari two twibasiwe cyane n’iki cyorezo.
Bivugwa ko uku kwiyongera kw’iyi ndwara i Kinshasa, ahanini byavuye ku myuzure yahibasiye cyane mu mezi angahe ashize, ikangiza ibikorwa remezo birimo imiyoboro y’amazi ndetse n’inzu zo guturamo.
Kuko leta ya Congo, ibinyujije ku muvugizi wayo, Patrick Muyaya, yari yasobanuye ko abafashwe n’iyi ndwara, ngo ni abimuwe n’iyi myuzure bacumbikirwa mu nkambi zitandukanye.
Uyu muvugizi kandi yari yanavuze ko ubushobozi bw’ibitaro ndetse n’aho gushyingura abicwa n’iyi ndwara buri kuba buke.
