RDC: Abavugwa mu mugambi wo gushaka guhirika ubutegetsi bwa Tshisekedi.
General Christian Tshiwewe Songesa n’abagenzi be batatu batawe muri yombi kubera gukekwaho gushaka guhirika ubutegetsi bwa perezida Felix Tshisekedi muri Repubulika ya demokarasi ya Congo.
Amakuru aturuka i Kinshasa ku murwa mukuru w’iki gihugu cya RDC, avuga ko General Christian Tshiwewe ari we wari uyoboye uwo mugambi watangiye gutahurwa mu ntangiriro z’iki cyumweru turimo.
Abandi aya makuru yemeza ko bari kumwe na General Christian Tshiwewe ni Lt.Gen. Jean Claude Yav, Maj.Gen. Maurice Nyembo n’undi musirikare ufite ipeti rya Colonel.
Christian Tshiwewe ukekwaho kuyobora umugambi wo gushaka guhirika ubutegetsi bwa Tshisekedi, yahoze ari umugaba mukuru w’Ingabo za Congo, kuri ubu akaba yari Umujyanama mukuru wa perezida Felix Tshisekedi mu by’umutekano.
Aya makuru akomeza avuga ko kuva mu gitondo cyo kuri uyu wa kane, nta winjira cyangwa ngo asohoke mu rugo rwa Gen. Christian Tshiwewe. Abarinzi be bambuwe imbunda, kandi bamwe mu nshuti ze na bo batawe muri yombi.
Ibi bikaba bije nyuma y’aho mu gitondo cyo ku wa mbere w’iki cyumweru, Lt.Gen. Jean Claude Yav yari yategetswe kudasohoka mu rugo rwe i Kinshasa, aho yari yabitegetswe n’urwego rushyinzwe iperereza ry’igisirikare.
Ndetse ku wa kabiri ahita ajanwa ku biro bya CNS guhatwa ibibazo, ariko aza kurekurwa, naho Lt.Gen Christian Tshiwewe akomeza kubazwa.
Iri joro ryaraye rikeye rishyira kuri uyu wa kane, bafashe Gen. Maurice Nyembo, wahoze ari umuyobozi w’ibiro bya Gen. Tshiwewe mu gihe yari akiri umugaba mukuru w’Ingabo za Congo.
Mu gihe kandi na Colonel Adelard Mwiza, na we ushinzwe umutekano wa Gen. Tshiwewe, yaje gutabwa muri yombi mu gitondo cyo kuri uyu wa kane, nk’uko aya makuru ava i Kinshasa akomeza abivuga.
Nanone kandi hari n’andi makuru avuga ko Tshiwewe azira kuba yaravuganye kuri telefone n’umuhuza bikorwa w’ihuriro rya Alliance Fleuve Congo, ribarizwamo umutwe wa M23 n’uwa Twirwaneho, Corneille Nangaa.
Ibi ngo akaba ari nabyo baherako bamukekaho gushaka gukubita coup d’etat.
