RDC: Imirwano ikaze hagati ya AFC/M23–Twirwaneho na FARDC/Wazalendo ikomeje gukaza umurego muri Fizi
Imirwano ikaze yadutse mu gace ka Pemba, gaherereye hagati y’imihana ya Munene na Kasekesi, werekeza i Makobola muri teritware ya Fizi, mu ntara ya Kivu y’Amajyepfo. Iyi mirwano ihuje umutwe wa AFC/M23/MRDP–Twirwaneho n’ingabo za Leta ya Repubulika ya Demokarasi ya Congo (FARDC), zifatanyije n’imitwe ya Wazalendo. Iyi ntambara irushaho gushyira umutekano w’iyi ntara mu rujijo, mu gihe AFC/M23/MRDP–Twirwaneho ikomeje kwagura no kurinda ibice igenzura.
Abaturage n’abatangabuhamya bavuga ko habonetse amato abiri ya gisirikare ku Kiyaga cya Tanganyika, atwaye ibikoresho bya gisirikare bikomeye, birimo n’intwaro ziremereye, byerekejwe mu misozi ikikije ako gace. Haravugwa ko ayo mato atwaye ingabo z’u Burundi zaje gutanga umusanzu mu gufasha FARDC, ibintu bikomeje kongera impungenge ku mutekano w’abaturage baho.
Ku ruhande rwa Wazalendo, bayobowe na William Amuri Yakutumba, batangaje ko bari mu rugamba rwo gukumira kwaguka kwa M23 berekeza mu bice bya Mboko no mu mujyi wa Baraka. Abo barwanyi bashimangira ko bafite intego yo kwisubiza Uvira, bakavuga ko biteguye gukomeza imirwano nubwo ikomeje guteza abaturage ibibazo bikomeye by’ubuzima n’ubutabazi.
Amakuru agezweho agaragaza ko AFC/M23 imaze gufata uduce twinshi two mu gace ka Makobola, turimo Bangwe, Ngalula, Katuta na Kasekesi, kimwe n’imisozi ya Pemba na Mitambwe, mu duce two muri teritware ya Fizi twerekeza i Uvira. Uku kwaguka kw’ibice bigenzurwa n’uyu mutwe kurushaho gutera ibyishimo mu baturage bo mu Burasirazuba bwa RDC, ni mu gihe bamwe bagaragaza ko barambiwe ubutegetsi bwa Kinshasa.
Mu gihe imirwano igikomeje, abaturage barasabwa kwitandukanya n’ibikorwa bya gisirikare, mu gihe imiryango itegamiye kuri Leta n’abafatanyabikorwa mpuzamahanga bakomeje gusaba ko hafatwa ingamba zihuse zo kurinda abasivili no gushakira akarere umuti urambye w’amahoro.
