Ubuhanuzi bwa Pasiteri Kavoma ku Mijyi Ikomeye Ivugwa ko Igiye Gufatwa: Isesengura ry’Amakuru Yatanzwe
Ubuhanuzi bwatanzwe n’umukozi w’Imana, Pasiteri Sodoki Kavoma, ku byerekeye ibigiye kuba mu Burasirazuba bwa Repubulika Iharanira Demokarasi ya Congo, buvuga ko Imana yamuhishuriye ko umujyi wa Uvira ugiye gushyirwa mu maboko y’umutwe wa AFC/M23/MRDP-Twirwaneho.
Mu kiganiro yahaye Minembwe Capital News, Pasiteri Kavoma yavuze ko atari Uvira yonyine iri mu byo yagarutsweho, ahubwo ko na teritwari ya Fizi, umujyi wa Kalemie, Kisangani, n’ibindi bice byo muri Kivu y’Amajyepfo nabyo bizafatwa n’ihuriro ry’ingabo Alliance Fleuve Congo (AFC/M23/MRDP-Twirwaneho).
Yagize ati:
“Imana yambwiye ngo mbwire Abanyekongo bose ko umujyi wa Uvira, Kisangani, Kalemie, Fizi n’ibindi bice byo muri Kivu y’Amajyepfo bigiye gufatwa na AFC/M23/MRDP-Twirwaneho, kandi bizaba mu gihe cya vuba cyane.”
Pasiteri Kavoma yanagarutse ku mirwano imaze igihe ibera mu misozi y’i Mulenge, avuga ko iyo mirwano ifite indi ntego itagaragarira buri wese. Yemeza ko ihuriro ry’ingabo za Leta ya Congo (FARDC) n’abafatanyabikorwa baryo riri kugemurira ibikoresho bya gisirikare umutwe wa MRDP-Twirwaneho na M23, binyuze mu ntambara zibahuza.
Yanavuze ko hari imirwano ikomeye izaba muri iyi misozi ibiri, hanyuma intambara ikamanuka mu bice bya Fizi, igana ku mushasha. Yakomeje avuga ko iyo mitwe igomba gushaka ububiko bukomeye bwo kubikamo intwaro, amasasu n’ibindi bikoresho bya gisirikare, kuko FARDC n’abo bafatanyije bazabyamburwa muri izi ntambara ziri kubera mu Mikenke no mu nkengero za Minembwe.
Yongeyeho ko hari agace kazabamo intambara ikomeye cyane ubwo AFC/M23/MRDP-Twirwaneho izaba yegereje gufata Uvira iturutse mu kibaya cya Rusizi. Avuga ko iyo mirwano izabera mu duce two mu nkengero z’uwo mujyi, hagati y’ibilometero 10 na 15 uvuye mu mujyi rwagati.
Pasiteri Kavoma asanzwe azwi mu Burasirazuba bwa Congo kubera ubuhanuzi bwagiye buvugwa ko yatanze mbere y’uko hafatwa imijyi imwe n’imwe. Yigeze gutangaza ko imijyi ya Goma na Bukavu izafatwa mu gihe kimwe kandi cyegeranye. Nyuma y’ifatwa ry’iyo mijyi, Kavoma yavuze ko Abanyamulenge bo mu misozi y’i Mulenge bazahita babona ubutabazi. Ibi byarasohoye, kuko nyuma yo gufata Bukavu, hari abasirikare ba M23 bagaragaye muri ibyo bice bafatanyije na MRDP-Twirwaneho, bafata uduce dutandukanye turimo Rugezi n’ahandi mu kwezi kwa gatatu umwaka ushize.
Ibi byakurikiyeho nyuma y’uko MRDP-Twirwaneho yari yamaze gufata Minembwe na Mikenke mu kwezi kwa kabiri k’umwaka wa 2025, ibintu byahinduye isura y’umutekano muri ako gace.
Intambara mu Burasirazuba bwa RDC imaze imyaka myinshi ishingiye ku mpamvu zirimo imiyoborere mibi, amakimbirane ashingiye ku moko, inyungu zishingiye ku mutungo kamere, ndetse n’imikoranire y’imitwe yitwaje intwaro itandukanye ikorana na Leta y’i Kinshasa.
Uvira ifite akamaro kanini mu by’ubucuruzi no mu by’umutekano, kuko iherereye ku mupaka uhuza RDC n’u Burundi kandi iri hafi y’ikiyaga cya Tanganyika. Kalemie nayo ni umujyi w’ingenzi ku byambu no ku migenderanire y’ubucuruzi mu karere.
Kuri ubu, Pasiteri Sodoki Kavoma atuye mu gihugu cya Uganda, aho akomeje ibikorwa by’ivugabutumwa birimo kubwiriza, gusenga no kuyobora ibikorwa byo kwagura umurimo w’Imana.
Ubuhanuzi bwe bamwe babufata nk’ubutumwa bw’ihumure, ariko bizwi ko ibyo ahanura bisohora byanze bikunze. Ibyo yavuze bizakomeza gukurikiranwa n’abasesenguzi b’umutekano n’abakurikirana ibibera mu Burasirazuba bwa RDC, mu gihe hategerejwe kureba niba ibyo yahanuye bizasohora, kuko intambara mu Burasirazuba bwa RDC zirakomeje mu bice bitandukanye by’ako gace.
