Ubusesenguzi ku Bitekerezo bya Girinka Kabare ku Mibanire ya Perezida w’u Burundi n’Abanyamurenge
Umusesenguzi w’Umunye-Congo wo mu bwoko bw’Abanyamulenge, William Girinka Kabare, mu kiganiro yagiranye na Minembwe Capital News kuri uyu wa gatandatu tariki ya 06/12/2025, yagarutse ku bibazo by’ingenzi bijyanye n’imibanire y’u Burundi, Abanyamurenge, n’imirwano ikomeje mu Burasirazuba bwa DR Congo.
Yatangiriye ku kibazo gikunze kwibazwa ati: “Ese Perezida Ndayishimiye ni umwanzi w’Abanyamurenge?”
Girinka yahakanye yivuye inyuma, avuga ko Perezida Évariste Ndayishimiye atari umwanzi w’Abanyamurenge gusa, ahubwo ko n’ubuyobozi bwe buri mu nzira yo kwangiza inyungu z’Abarundi ubwabo. Asobanura ko ibyo abishingira ku buryo u Burundi bukomeje kwinjira mu bibazo by’imbere muri DR Congo, ibintu asanga bitazagira akamaro ku gihugu igihe kirekire.
Yibukije ko Ndayishimiye ntaho yagaragaye mu masezerano y’i Doha hagati ya AFC/M23/Twirwaneho na Leta ya DR Congo, kandi ko n’ibiganiro byabereye i Washington hagati ya DR Congo n’u Rwanda bitagaragayemo uruhare rwe. Ndetse anavuga ko nta kintu yigeze avugwa ku biganiro hagati ya AFC/M23/Twirwaneho na Leta ya Kinshasa.
Ku bwe, kuba u Burundi bwivanga mu ntambara hagati y’Abanye-Congo ubwabo, kandi budakorana n’ibihugu cyangwa imiryango ikomeye ku rwego mpuzamahanga, bishobora kuzagira ingaruka zikomeye ku mutekano n’inyungu z’u Burundi mu bihe bizaza.
Girinka anashinja Perezida Felix Tshisekedi gukoresha Ndayishimiye mu nyungu z’igihe gito. Ati: “Tshisekedi yizeza Ndayishimiye amafaranga, zahabu n’ibindi byitwa ubutunzi bw’akanya gato, bishobora gusenya igihugu ejo hazaza.” Yongeraho ko ibyo byose bishobora kuba ari uburiganya bwa politiki, urugero ngo ni ukubeshya ko hari uruganda rw’imyenda ya gisirikare ruzubakwa mu Burundi, nyamara nta mugambi wo kubishyira mu bikorwa uhari.
Avuga ko ku nyungu z’igihe kirekire, u Burundi bukwiye gushimangira umubano n’abaturanyi ba hafi, cyane cyane abo mu Ntara ya Kivu y’Amajyepfo, n’imitwe nka AFC/M23/Twirwaneho, ayita “abaturanyi b’ibihe byose”.
Asaba ko u Burundi bwirinda kwishora mu ntambara zambukiranya imipaka kuko zishobora kubangamira umutekano, ubukungu n’ubutwererane bw’akarere.
Girinka atanga impuruza ko gukomeza gukorana bya hafi na Tshisekedi, no gufasha ibikorwa bya gisirikare bibangamira abaturage n’ibikorwa remezo bya DR Congo, bishobora gushyira u Burundi mu ngaruka zikomeye. Ati: “Arimo kurema umwanzi w’ibihe byose naramuka akomeje kurwana intambara itari iye.”
Mu gusoza, yibutsa ko hakiri kare kugira ngo u Burundi bugorore icyerekezo, agasaba Perezida Ndayishimiye kwisubiraho, agashaka umubano mwiza n’abaturanyi, cyane cyane abo muri Kivu, kandi akareka “Intore y’umutsima ya Tchilombo.” Avuga ko Tshisekedi amuhenda kandi ntacyo azamumarira.
Ati: “Umubanyi ni we muryango. Congo azayibura ayirebesha ijisho ry’umusesenguzi.”
Ubusesenguzi bwa Girinka bwerekana ko politiki y’u Burundi yo kwinjira mu ntambara zo muri DR Congo ishobora guteza ingaruka zikomeye ku mutekano w’akarere, bityo agasaba ubuyobozi bw’u Burundi guhitamo inzira y’ubufatanye, imishyikirano n’ubuturanyi bwiza aho kwinjira mu ntambara zitari izayo.
