Umunsi w’Ituze Nyuma y’Iminsi y’Imirwano Ikomeye hagati ya FARDC na MRDP–Twirwaneho
Mu misozi miremire y’i Mulenge, iherereye muri teritwari ya Fizi mu Ntara ya Kivu y’Amajyepfo muri Repubulika Iharanira Demokarasi ya Congo, kuri uyu wa Gatatu tariki ya 11/03/2026, abaturage babyutse mu ituze ugereranyije n’iminsi yari ishize yaranzwe n’imirwano ikomeye hagati y’ihuriro ry’ingabo za RDC na MRDP–Twirwaneho ifatanyije na M23.
Amakuru aturuka muri ako gace avuga ko uyu munsi hiriwe hatuje mu Minembwe no mu nkengero zaho, nyuma y’iminsi myinshi yaranzwe n’ibitero by’ingabo za Leta ya Congo (FARDC) zifatanyije n’ingabo zaturutse mu bihugu by’inshuti ndetse n’imitwe yitwaje intwaro ikorana na zo. Muri ayo makuru, havugwa ko muri ibyo bikorwa harimo ingabo z’u Burundi, iza Angola, hamwe n’imitwe ya Wazalendo ndetse n’umutwe wa FDLR, bivugwa ko bagaba ibitero mu mihana itandukanye ituwemo n’Abanyamulenge iri mu misozi ya Minembwe no mu nkengero zayo.
Gusa amakuru ava ku ruhande rw’abarwanya ibyo bitero aravuga ko ingabo za MRDP–Twirwaneho, zifatanyije na M23, zashoboye gusubiza inyuma ibyo bitero nyuma y’imirwano ikomeye yabereye mu bice bitandukanye by’aka karere.
Umwe mu basirikare ba MRDP–Twirwaneho waganiriye na Minembwe Capital News yatangaje ko ku munsi w’ejo hashize, tariki ya 10/03/2026, habereye imirwano ikomeye mu gace ka Kalingi. Yavuze ko FARDC n’abo bafatanyije bagabye ibitero bikomeye ariko bakaza gusubizwa inyuma.
Yagize ati:
“Uyu munsi twiriwe mu ituze mu Minembwe no mu nkengero zaho. Ariko ejo hashize mu Kalingi habaye imirwano ikomeye. Ku ruhande rwa MRDP–Twirwaneho abasirikare bakoze akazi neza, basubiza inyuma FARDC n’abo bafatanyije.”
Amakuru aturuka mu baturage bo muri ako gace na yo agaragaza ko imirwano yahagaritse ibikorwa byinshi by’ubuzima busanzwe mu minsi ishize, aho abaturage benshi bahisemo guhungira mu misozi cyangwa mu bindi bice bifatwa nk’aho bifite umutekano ugereranyije.
Uretse imirwano yo ku butaka, amakuru atandukanye yemeza ko ingabo za FARDC zakoresheje n’ibitero byo mu kirere zifashishije indege zitagira abapilote (drones). Izi drones bivugwa ko zagabye ibitero mu duce dutuwe cyane muri Minembwe.
Urugero rutangwa ni urwabaye ku wa Mbere w’iki cyumweru, aho izo drone zangije ibikorwa remezo bitandukanye. Mu byangiritse harimo inyubako ikoreramo radiyo y’abaturage izwi nka Radio Tuungane Minembwe, ndetse n’ibice bimwe by’inyubako z’ishuri ryisumbuye rya Madegu riherereye muri centre ya Minembwe.
Ibi byateye impungenge mu baturage bavuga ko ibitero byo mu kirere bikunze gushyira mu kaga abasivili n’ibikorwa by’ingenzi byifashishwa mu mibereho yabo ya buri munsi.
Amakuru ava mu baturage ndetse no mu masoko atandukanye yo muri ako gace avuga ko nyuma y’imirwano yabereye mu Kalingi, ingabo za FARDC n’imitwe bayifatanyije byavuzwe ko zasubijwe inyuma zigana mu bice bya Mutunda na Bicumbi, nyuma yo kwambuka uruzi runini rwa Rwiko.
Ibi byatumye kuri uyu wa Gatatu haboneka agahenge mu Minembwe no mu nkengero zaho, nubwo abaturage bagikomeje kuba maso kubera ubwoba ko imirwano ishobora kongera kubura umwanya uwo ari wo wose.
Minembwe n’uturere tuyikikije tumaze imyaka myinshi turi mu bibazo by’umutekano muke bishingiye ku makimbirane y’amoko, imitwe yitwaje intwaro n’inyungu za politiki n’ubukungu byo mu Burasirazuba bwa Congo. Aka gace gatuwe n’amoko atandukanye arimo Abanyamulenge, Ababembe, Abanyindu n’abandi, bikunze guteza amakimbirane ashingiye ku butaka, ubutegetsi n’umutekano.
Mu myaka yashize, imitwe itandukanye yitwaje intwaro irimo FDLR, Mai-Mai (Wazalendo) ndetse n’indi mitwe yagiye igaragara muri aka gace, bigatuma abaturage bakomeza guhura n’ibibazo birimo guhunga, kubura umutekano n’ikorwa ry’ibikorwa by’iterabwoba.
Nubwo uyu munsi wagaragaje ituze ugereranyije n’iminsi ishize, abaturage bo muri Minembwe bavuga ko igikenewe kurushaho ari igisubizo kirambye cy’amahoro n’umutekano, kugira ngo ubuzima busanzwe bushobore gusubira mu buryo burambye muri aka karere kamaze igihe kirekire mu makimbirane.
