Umuyobozi Mukuru wa Televiziyo ya RTNC yahagaritswe
Ubuyobozi bukuru bwa Televiziyo ya RTNC muri Repubulika Iharanira Demokarasi ya Congo (RDC) bwatangaje ko bwahagaritse by’igihe gito Umuyobozi Mukuru w’Amakuru, Oscar Mbal Kahij, mu rwego rwo gukumira no gukosora amakosa akomeye avugwa mu mikorere y’itangazamakuru.
Iki cyemezo cyafashwe nyuma y’uko uyu muyobozi yemereye ko ku muyoboro wa televiziyo hatambutswa amagambo ashobora gusebanya no gupfobya umuryango w’Abatutsi, yagarutsweho n’Umuvugizi w’Ingabo za RDC (FARDC), Général Sylvain Ekenge Efomi.
Ubuyobozi bukuru bwasobanuye ko ihagarikwa rya Oscar Mbal Kahij rishingiye ku kurinda amahame y’umwuga w’itangazamakuru, arimo uburinganire, kubaha ikiremwamuntu, no kwirinda imvugo z’urwango cyangwa ivangura rishingiye ku moko, idini cyangwa inkomoko.
Byongeye, ubuyobozi bwashimangiye ko itangazamakuru rifite inshingano zo gusesengura no gutambutsa amakuru mu bwitonzi, rikirinda guha umwanya imvugo ishobora guteza umwiryane mu baturage cyangwa guhungabanya ubumwe bw’igihugu.
Iki cyemezo cyahise gitangizwa iperereza ryimbitse rizasuzuma uburyo ayo magambo yagejejwe ku baturage, hagamijwe gufata ingamba zikwiye no kwirinda ko ibyabaye byasubira mu gihe kizaza.
Ubuyobozi bukuru bwa Televiziyo ya RTNC bwasabye inzego zose z’itangazamakuru n’abanyamakuru gukomeza kubahiriza amahame mpuzamahanga y’umwuga, no gushyira imbere inshingano yo guteza imbere amahoro, ubumwe n’ukwizerana mu Banyekongo no mu karere muri rusange.
