Uwari inkingi ikomeye muri FDLR yapfuye.
Lieutenant General Hakizimana Apollinaire wari mu bayobozi bakomeye mu mutwe wa FDLR urimo abasize bakoze jenoside mu Rwanda, yapfuye.
Uyu mu Jenerali wari uzwi cyane ku izina rya Poète yari uwa gatatu mu bayobozi bakuru muri FDLR akaba yarashinzwe ibikorwa bya gisirikare muri uyu mutwe.
Minembwe.com yamenye ko Lt.Gen Hakizimana yapfiriye mu bitaro bikuru biherereye kuri Zone ya Masisi, ku wa gatatu tariki ya 01/1/2025, ni nyuma y’uko yari amaze igihe kirekire arwaye zimwe mu ndwara zidakira.
Umwirondoro wasomwe ubwo uyu mugabo yashingurwaga, amakuru avuga ko byavuzwe ko yavukiye muri perefegitire ya Gisenyi, kandi ko yavutse mu 1957.
Uyu wapfuye yanabaye mu buyobozi bukuru bw’umutwe wa ALIR waje kuvamo FDLR; icyo gihe yari ashinzwe ubutasi. Uwo mutwe wari ugamije gutera u Rwanda.
Ubwo ingabo za EX-Far zahungiraga mu mashyamba ya Congo yari afite ipeti rya major, agenda azamuka mu mapeti kuburyo yageze ku rya Brig Gen muri 2007, nyuma aza guhabwa irya major Gen mu gihe muri 2019 ari bwo yagizwe Lt Gen.
Gusa, uyu mugabo yari yarafatiwe ibihano n’amahanga, ashinjwa kugira uruhare mu gutegura ibikorwa byiciwemo Abanyekongo, n’ibindi bihungabanya umutekano wo mu Burasirazuba bwa RDC.
