Brigadier General Eddy Kapend, wahoze mubyegera bya Mzee Kabila, akaba yari yaranahamijwe kwica Laurent-Desiré Kabila mu mwaka w’2001, gusa yaje kubabarirwa muri uwo mwaka w’ 2021, yatsimbuye, Gen Gihanga Mutara Smith wari umuyobozi w’akarere ka 22 k’igisirikare, muri Repubulika ya demokarasi ya Congo kari mu ntara ya Haut-Katanga.
Iyi mpinduka yabaye mw’ijoro ryo kuri uyu wa Kane, tariki 19/10/2023, nyuma y’aho Perezida Félix Tshisekedi asubije Kapend mu gisirikare akanamuzamura mu ntera, amuvanye ku ipeti rya Colonel yari afite kuva ku butegetsi bwa Laurent Kabila, ubwo yari ashinzwe umutekano we wihariye.
Major Gen Gihanga yaherukaga gutabwa muri yombi tariki ya 23/06/2023, aho yakekwagaho uruhare mu bujura bw’amabuye y’agaciro y’umuringa yabarirwaga muri toni 120, yari ay’ikigo TFM gikorera ubucukuzi muri Lubumbashi.
Uyu musirikare yaje kurekurwa mu ntangiriro z’uku kwezi kwa Cumi (10), nyuma y’aho iperereza ryakorwaga n’igisirikare ryabuze ibimenyetso bihamya ko yaba afite uruhare muri ubu bujura bw’amabuye y’agaciro.
Nyuma yo gufungurwa uyu musirikare Major Gen Gihanga nta kigaragaza ko yasubiye mu nshingano yo kuyobora akarere ka 22 k’igisirikare, kugeza ubwo asimbujwe uyu Gen Kapend.
By Bruce Bahanda
