M23 yakubise ahabaza ihuriro ry’Ingabo za RDc, kuri uyu wa Kabiri tariki ya 03/09/2024.
Ni mu mirwano yazindutse ibera mu bice byo muri teritwari ya Masisi, mu gitondo cyo kuri uyu wa Kabiri, aho ihuriro ry’Ingabo za Guverinoma ya Repubulika ya demokarasi ya Congo ryagabye ibitero mu birindiro bya M23, birangira uyu mutwe ubavugutiye umuti.
Amasoko yacu atandukanye dukesha aya makuru, avuga ko mu birindiro bya M23 biri ahitwa Bibwe-Machumbi, nibyo byagabwemo ibitero by’ingabo za FARDC, FDLR, Wazalendo, ingabo z’u Burundi na SADC, ariko ibi bitero biza kubera iri huriro ry’ingabo za RDC ihurizo rikomeye.
Ni mu gihe ingabo z’umutwe wa M23 zirwanyeho, maze ziza gukubita zitababarira ririya huriro, ryamburwa n’ibikoresho by’agisirikare, birimo imbunda ziremereye n’ibindi bikoresho byifashishwa mu itumanaho.
Usibye ibikoresho byafashwe, binavugwa kandi ko ingabo z’u Burundi, Wazalendo na FARDC zahaguye ku bwinshi.
Bibwe-Machumbi, biri muri Grupema ya Bashali Mukoto ho muri teritware ya Masisi, mu Ntara ya Kivu Yaruguru.
Sosiyete sivile yo muri ibyo bice, yahamije aya makuru, inatangaza ko iyo mirwano yo kuri uyu wa Kabiri, yatumye abaturage bahunga ku bwinshi. Ku bwa Sosiyete sivile, iyi mirwano yahanganishije M23 n’ihuriro ry’Ingabo za RDC, yatangiye igihe c’isaha ya saa kumi nimwe z’urukerera rwo kuri uyu wa Kabiri.
Iyi mirwano yabaye nyuma y’uko muri iri joro ryo ku wa mbere, rishyira kuri uyu wa Kabiri, imitwe y’itwaje intwaro izwiho ubufatanye n’ingabo za RDC yasahuye abaturage b’i Kaniro ho muri teritware ya Masisi, ibirimo amatungo magufi, amabutike, ndetse kandi batwika n’amazu yo muri aka gace 46.
Sosiyete sivile ikaba ishinja abarwanyi bayobowe na Gen Mutayomba kuba inyuma yubwo bugizi bwa nabi. Igaraza ko habaye ukutumvikana hagati y’abarwanyi ba Gen Mutayomba na Gen Autoproclame Kigingi Kigeri; ari nabyo byatumye aka gace Kigingi Kigeri asanzwe agenzura gasahurwa.
Hagati aho ubushamirane bukomeje gufata indi ntera hagati ya M23 n’igisirikare cya Repubulika ya demokarasi ya Congo. Utaretse ko M23 ikomeje kwibikaho ibice byinshi ari nako ikomeza kuja imbere y’irukana abarwana ku ruhande rwa Leta.
MCN.
