Ababembe bavuzwe m’urupfu rwa Col.Wamba uheruka kwicwa.
Amakuru agera kuri Minembwe.com, yemeza ko Col.Wamba Kifaranga Hondwa uheruka kwicwa arasiwe mu Mikenke, yishwe n’insoresore z’Ababembe ku kagambane k’ingabo za FARDC zikorera muri ibyo bice.
Mu mugoroba wa joro wo ku Cyumweru tariki ya 01/12/2024 ni bwo Col. Kifaranga wari umurwanyi ukomeye muri Maï Maï yarashwe mu cyico agahita yitaba Imana ako kanya.
Nyuma y’iraswa rye, mu Mikenke no mu nkengero zayo humvikanye urusaku rw’imbunda rwinshi, ibyanatumye abaturage baturiye ibyo bice bahunga, ndetse abenshi barara mu bihuru. Abandi bake bahungira mu Minembwe.
Byavuzwe ko Maï Maï kwari yo yarimo irasagura ayo masasu aho ngo byari mu rwego rwo kwerekana ko yatakaje umurwanyi ukomeye.
Inkuru zatangajwe nyuma y’urupfu rwa Col. Kifaranga zavugaga ko yishwe n’ingabo za FARDC, ariko ku rundi ruhande bikavugwaga ko yishwe n’Abanyamulenge.
Uyu murwanyi yarasiwe mu gasambu gahurukira ku bitaro bikuru bya Mikenke, werekeza mu muhana w’Ababembe; akaba yarimo yitembeza aho hafi. Binavugwa kandi ko yapfanye n’umusirikare umwe wo mu ba esikoti be.
Ubuhamya bwatanzwe n’umuntu uri muri ibyo bice ariko ku bw’umutekano we, yanga ko amazina ye atangazwa, yemeje ko Kifaranga yarashwe n’Ababembe kandi ko uwo mugambi ingabo za FARDC zari ziwurimo.
Kifaranga Hondwa ni we wari w’ungirije General Mutetezi Trèsor. Avuka mu bwoko bw’Abanyindu; yarazwiho ubugome ahanini ku Banyamulenge, kuko yagiye ayobora ibitero byinshi byo ku babyaga Inka, ndetse n’ibyo kubica.
Ababembe n’Abanyindu bafitanye ubugome bushingiye ku nka z’Abanyamulenge izo bagiye babanyaga. Ibi bikaba biri mu bituma bicana.
Uru rwango kandi ruri hagati y’Abapfulero n’Ababembe, ni mu gihe Abanyindu n’Abapfulero bafatanye isano ryahafi, nk’uko amateka abivuga, ndetse n’ururimi bavuga rukaba rwenda gusa.
Uyu Kifaranga uheruka kwicwa n’Ababembe yashinguwe ku wa gatatu tariki ya 04/12/2024; ashingurirwa ahitwa Katungulu ho muri teritware ya Fizi.