M23 yababaje bikomeye ubutegetsi bw’i Kinshasa.
Kuri uyu wa gatandatu tariki ya 04/01/2025, umutwe wa M23 wigaruriye centre ya teritware ya Masisi ifatwa nk’ahantu hingenzi muri Kivu Yaruguru mu Burarasirazuba bwa Repubulika ya demokarasi ya Congo.
Ahagana isaha z’igicamunsi cyo kuri uyu wa gatandatu ni bwo ingabo ziyobowe na Major Gen Sultan Makenga zabohoje zone ya Masisi.
Amakuru ava muri ibyo bice ahamya ko M23 yigaruriye aka gace nyuma y’intambara iremereye aho yari hanganye bikomeye n’ingabo zirwanirira ubutegetsi bwa perezida Félix Tshisekedi.
Amashusho yagiye hanze ubwo intambara yarimo ibere muri ako gace, yagaragazaga urujya n’uruza rw’abantu barimo bahunga bamwe berekeza Nyabiondo, Bukombo ndetse no mu tundi duce duherereye ahataberaga imirwano.
Depite watorewe muri Masisi, Alexis Bahunga yemeje ko M23 yafashe centre ya Masisi.
Yagize ati: “Birababaje kumenya ko centre ya Masisi yafashwe na M23.”
Minembwe.com yamenye ko zone ya Masisi yafashwe nyuma y’aho abarwanyi ba M23 bari bamaze gufata agace ka Mushebere. Aba barwanyi gufata ako gace byabahaye amayeri akomeye yo gufata centre nini ya Masisi.
Depite Alexis Bahunga yanasabye kandi guverinoma ya Congo gukora ibishoboka byose ikohereza ibikoresho nkenerwa, mu rwego rwo kugira ngo barwanye M23 bivuye inyuma.
Yavuze ko gufatwa kwa Zone ya Masisi bishobora guteza ibyago byinshi byo kuba na Walikale yafatwa yose, bityo n’umujyi wa Goma ukaba waja mu biganza byabo.
Hagataho imirwano irakomeje hagati ya M23 n’ingabo za RDC, ariko uru ruhande rwa Leta rurwana ruri guhunga, ari nako uyu mutwe wa M23 ukomeza kugenda ubohoza uduce twinshi.
