Ababarirwa mu magana biciwe i Moba ahahoze hatuye Abanyamulenge.
Muri teritware ya Moba mu ntara ya Tanganyika, mu gihugu cya Repubulika ya demokarasi ya Congo, hiciwe abantu 318, bicwa n’umutwe witwaje intwaro ukorera muri iki gice.
Moba ni teritware yo muri Tanganyika, isanzwe ifite agace kitwa Byura. Aka gace kahoze gatuyemo Ingo z’Abanyamulenge zibarirwa mu bihumbi, kuva mu myaka yo ha mbere, aho zaje kuhakurwa n’intambara zo mu mwaka wa 1997. Bongera gusubira i Mulenge muri Kivu y’Amajyepfo, aho bari baraje bava icyo gihe.
Abenshi mu bari barabungiye muri kariya gace basobanura ko bari barajanweyo ahanini no kuragira Inka zabo, ubutunzi Abanyamulenge basanzwe bashyira imbere cyane kuruta ubundi bwose.
Rero, aha Moba, amakuru agaragaza ko mu ijoro ryo ku itariki ya 14 rishyira ku ya 15/06/2025, umutwe w’inyeshyamba ugakoreramo wakicyiyemo abantu 318.
Ni amakuru yashyizwe hanze bwa mbere n’umuyobozi mukuru w’inteko ishinga amategeko ya Congo, Vital Kamerhe, akaba yagize ati: “I Moba umukuru w’umutwe witwara gisirikare yatuye umujinya ku baturage arabica mu ijoro ryo ku itariki ya 14/06/2025. Yishe abaturage 318. Ibi mu nteko ishinga amategeko ntidushobora kubyihanganira.”
Nubwo aya makuru yatangajwe n’umutegetsi wo hejuru muri RDC, ariko ntiyasobanuye neza uwo mutwe wakoze ubwo bwicanyi.
Kimweho yavuze ko ubu bwicanyi bwakorewe abaturage ba Moba, bwakurikiwe n’uruzinduko minisitiri w’ingabo za Congo aheruka kugirira mu ntara ya Tanganyika, ikindi nuko muri urwo ruzinduko yatunze agatoki imitwe y’inyeshyamba ikorera muri icyo gice.
Ku rundi ruhande amakuru ava i Moba yo agaragaza ko ubwicanyi bwahabereye ari isubiranamo ry’amoko ahatuye.
Agira ati: “Abantu 318 biciwe i Moba mu ntambara yo gusubiramo kwa moko yaho. Imihana igera kuri 20 iratwikwa. Yahindutse umuyonga.”
