RDC: Korera irimo guhitana abantu muri Fizi, abandi icumi bamaze kugaragaza ibimenyetso byayo
Abantu batatu bamaze guhitanwa n’indwara ya korera mu gihe cy’icyumweru kimwe muri Teritware ya Fizi, mu Ntara ya Kivu y’Amajyepfo, mu gihe abandi bagera ku icumi bamaze kugaragaza ibimenyetso by’iyi ndwara.
Amakuru aturuka muri ako gace avuga ko iki cyorezo cyagaragaye mu bice biherereye mu nkengero za Centre ya Baraka, muri Teritware ya Fizi. Inzego zishinzwe ubuzima zikomeje gukurikirana uko ubwandu bw’iyi ndwara bugenda bwiyongera, mu rwego rwo kumenya ubukana bw’iki cyorezo no gufasha abamaze kwandura.
Korera ni indwara yandura cyane, ikunze gukwirakwira ahantu hari ikibazo cy’amazi meza, isuku nke ndetse n’uburyo buke bwo kubona serivisi z’ubuzima. Iyo umurwayi atabonye ubuvuzi ku gihe, ishobora gutera umwuma ukabije, bikaba byanashyira ubuzima bwe mu kaga mu gihe gito.
Kugeza ubu, amakuru ahari agaragaza ko abantu batatu bamaze gupfa bazize korera mu gihe cy’icyumweru kimwe, mu gihe abandi bagera ku icumi bamaze kumenyekana ko bafite ibimenyetso by’iyi ndwara.
Iki kibazo cy’ubuzima kibaye mu gihe abaturage bo mu bice bitandukanye by’Uburasirazuba bwa Repubulika Iharanira Demokarasi ya Congo bakomeje guhura n’ingaruka z’ubukene, kwimuka kw’abaturage ndetse n’ibibazo by’umutekano.
Ibi bibazo bishobora gutuma abaturage bamwe bagira imbogamizi mu kubona serivisi z’ibanze, zirimo amazi meza, isuku n’ubuvuzi, ibintu bishobora kongera ibyago byo gukwirakwira kw’indwara zandurira mu mazi, nk’iy’ikorera.
Minembwe Capital News (MCN)
