Minembwe: Me Nyarugabo Yasabye Abanyamulenge Kwirinda “Inyigisho Ziyobya”, Avuga ko Abagambanira Ubwoko Bazabazwa Ibyo Bakora

MINEMBWE CAPITAL NEWS (MCN)

Mu ijambo yagejeje ku baturage ba Minembwe, Me Moïse Nyarugabo, wahoze ari Minisitiri ndetse akaba yaranabaye Senateri muri Repubulika Iharanira Demokarasi ya Congo (RDC), yasabye Abanyamulenge kwirinda ibyo yise “inyigisho ziyobya” zikwirakwizwa n’abantu yavuze ko bahisemo gukorana n’abanzi b’umuryango wabo.

Iryo jambo yaritangaje mu ruzinduko rw’abayobozi b’Ihuriro Alliance Fleuve Congo (AFC/M23) bari kugirira muri Minembwe kuva ku wa Mbere w’iki cyumweru. Nk’uko byatangajwe n’abateguye uru ruzinduko, rugamije kuganira n’abaturage no kubahumuriza nyuma y’imyaka myinshi y’umutekano muke n’imirwano yakunze kuvugwa muri aka gace.

Mu butumwa bwe, Me Nyarugabo yakoresheje urugero rwo muri Bibiliya, agereranya abo yanenze n’Umwami Sauli, avuga ko abaturage batagomba kwemera inyigisho zabo.

Yagize ati:

“Mwirinde iyo njili; nayita injili y’amadayimoni. Hari abantu bacu, abana bacu n’abavandimwe bacu bahisemo gukorera Satani no kugambanira ubwoko. Iyo njili yabo ntimuzayumve. Nk’uko Dawidi yaririmbaga imyuka mibi ikava kuri Sauli, ni ko ukuri kuzatsinda ibinyoma.”

Yakomeje avuga ko, uko abibona, abazahitamo gukomeza uwo murongo bazisanga baryozwa ibikorwa byabo.

Yagize ati:

“Umunsi umwe bazatsindwa n’umwanzi. Bamwe bazamera nka Kayini, bafite isoni z’ibyo bakoze. Abazagaruka bazabazwa ibyo bakoze kandi bazabiryozwa.”

Me Nyarugabo yanavuze ko hari abantu, nk’uko abivuga, bashishikarije ibikorwa byibasira Abanyamulenge n’imitungo yabo, cyane cyane amatungo. Yavuze ko abo bireba bazabazwa uruhare rwabo kugira ngo, nk’uko yabisobanuye, ihame ryo kurwanya kudahana rishyirwe mu bikorwa.

Aya magambo aje mu gihe uburasirazuba bwa RDC bukomeje kuvugwamo amakimbirane n’ibibazo by’umutekano, aho impande zitandukanye zikomeje gutanga ibisobanuro bitandukanye ku ntandaro y’ibibazo ndetse n’uburyo byakemuka.

Uruzinduko rw’abayobozi ba AFC/M23 muri Minembwe rwakomeje kurangwa n’inama bagiranye n’abaturage ndetse n’abayobozi bo mu nzego zitandukanye, mu gihe abaturage benshi bakomeje kugaragaza icyifuzo cyo kubona amahoro arambye n’umutekano usesuye nyuma y’imyaka myinshi y’ibibazo bavuga ko byagize ingaruka ku mibereho yabo no ku iterambere ry’akarere.

— MINEMBWE CAPITAL NEWS (MCN)