Abacanshuro benshi bafashaga FARDC ku rwanya M23 bahungiye mu Rwanda.
Abarwanyi ba bacanshuro b’Abazungu biganjemo abo muri Romania bahungiye mu Rwanda bahunze umutwe wa M23 nyuma yaho ufashe i Goma mu Ntara ya Kivu y’Amajyaruguru.
Kuri uyu wa gatatu tariki ya 29/01/2025, ni bwo itsinda ry’abarwanyi bahoraga bafasha FARDC kurwanya umutwe wa M23 binjiye mu Rwanda.
Amakuru avuga ko baciye ku mupaka wa Gisenyi na Goma. Bakaba bahunze mu gihe umutwe wa M23 wabarushije imbaraga ufata uyu mujyi wa Goma uherereye mu Burasirazuba bwa RDC.
Inzego zishinzwe umutekano z’u Rwanda zivuga ko aba barwanyi binjiye mu gihugu cyabo bahunze M23 ari 288.
Kandi ko biganjemo abakomoka muri Romania, aha ku mupaka bahise burizwa za bus bajanwa i Kigali.
Ni amakuru kandi yanemejwe n’umuvugizi w’u Rwanda wungirije, Alain Mukuralinda, aho yatangaje ko aba barwanyi bahita burizwa indege bagasubizwa mu gihugu cyabo.
Inzego z’umutekano, zabanje kubasaka barimo kwinjira. Bamwe muri bo basanganywe ibipfunyika binini by’amadolari y’Amerika.
Ibinyamakuru byo muri Romania byatangaje ko ubwo intambara yari ikomeye muri Goma, aba bacanshuro bahungiye muri Hotel imwe iri mu mujyi wa Goma, bakabwira M23 ko bashyize intwaro zabo hasi.
Ibyo binyamakuru byanavuze ko aba barwanyi biganjemo abahoze mu gisirikare, ariko kubu bari bakorera ikigo cyigenga gifitanye amasezerano na Leta y’i Kinshasa.
Ndetse kandi bikavugwa ko imiryango yabo ikomeje kwegera Leta ya Romania kugira ngo ibafashe batahe.
M23 yo ivuga ko ubutegetsi bwa perezida Félix Tshisekedi bwazanye aba bacanshuro b’Abazungu kuyifasha kurwanya m23, kandi ko buri umwe ku kwezi ahembwa amadolari igihumbi.
Ariko iyi Leta y’i Kinshasa yagiye ivuga ko bazanye aba barwanyi kugira ngo batoze igisirikare cyabo kurwana.
Gusa, bizwi ko amasezerano mpuzamahanga ku bijyanye n’intambara abuza ikoreshwa ry’abacanshuro mu ntambara.
